માળિયા (મી) ના ખાખરેચી ગામ નજીક કારખાનાના કવાર્ટરમાં બીમારીથી કંટાળી ગયેલા યુવાને ફાંસો ખાઈને કર્યો આપઘાત

માળિયા (મી) ના ખાખરેચી ગામ પાસેની સીમમાં આવેલ કારખાનાના લેબર કવાર્ટરમાં રહેતા યુવાનને બીમારી હોય દર 10થી 15 દિવસે દવાખાને જવું પડતું હતું જેથી કંટાળી ગયેલા યુવાને પોતાની જાતે લેબર કવાર્ટરની અંદર ગળાફાંસો ખાઈને આપઘાત કરી લીધો હતો જે બનાવની મૃતક યુવાનના ભાઈએ માળિયા તાલુકા પોલીસ સ્ટેશન ખાતે જાણ કરતા પોલીસે આપઘાતના બનાવની નોંધ કરીને આગળની કાર્યવાહી કરી છે.

મૂળ રાજસ્થાનના રહેવાસી અને હાલમાં માળિયા (મી)ના ખાખરેચી ગામની સીમમાં આવેલ લેમિટ પેપરમીલ કારખાનાની લેબર કોલોનીના ક્વાર્ટરમાં રહેતા હરીશભાઈ ટોલિયાભાઈ મકવાણા (23)એ પોતે પોતાની જાતે લેબર કવાર્ટરમાં પંખા સાથે ચુંદડી બાંધીને ગળાફાંસો ખાઈ લીધો હતો જેથી કરીને તેને તાત્કાલિક જેતપર ગામે આવેલ સામૂહિક આરોગ્ય કેન્દ્ર ખાતે લઈને આવ્યા હતા અને ત્યાં ફરજ પરના ડોક્ટરે તેને મૃત જાહેર કર્યો હતો. ત્યારબાદ આ બનાવની મૃતક યુવાનના મોટા ભાઈ બદિયાભાઈ ટોલીયાભાઈ મકવાણા (25) રહે હાલ લેમિટ પેપર મીલના લેબર ક્વાર્ટરમાં મોરબી વાળાએ માળિયા તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી અને વધુમાં પોલીસ પાસેથી મળતી વિગત પ્રમાણે મૃતક યુવાનને છેલ્લા એકાદ વર્ષથી બીમારી હતી અને તેની સરવરા માટે દર 10થી 15 દિવસે તેને દરવાખાને જવું પડતું હતું જેથી કંટાળી ગયેલ યુવાને લેબર કવાર્ટરની અંદર ગળાફાંસો ખાઈને આપઘાત કર્યો છે.