મોરબી જિલ્લા સેવા સદનમાં આવેલ સરકારી કચેરીઓમાં કલેક્ટરનું રેન્ડમલી ચેકિંગ: ફફડાટ

મોરબી જિલ્લા સેવા સદન ખાતે કાર્યરત સરકારી વિભાગની જુદી જુદી કચેરીઓમાં આજે કલેક્ટર દ્વારા રેન્ડમલી ચેકિંગ કરવામાં આવ્યું હતું અને ત્યાં હાજર રહેલા અધિકારી અને કર્મચારીઓને જરૂરી સૂચના આપવામાં આવી હતી તેમજ ઓફિસમાં જે અધિકારી અને કર્મચારી હાજર ન હતા તેની સામે કાર્યવાહી કરાશે તેવું પણ કલેકટરે જણાવ્યુ હતું.

મોરબી શહેરના સામાકાંઠે વિસ્તારમાં શોભેશ્વર રોડ ઉપર જિલ્લા સેવા સદન આવેલું છે ત્યાં જિલ્લા કલેક્ટર કચેરી સહિત તમામ જુદા જુદા વિભાગની સરકારી કચેરીઓ કાર્યરત છે અને આ સરકારી કચેરીઓની અંદર આજે જિલ્લા કલેક્ટર સ્વપ્નિલ ખરે દ્વારા રેન્ડમલી ચેકિંગ કરવામાં આવ્યું હતું ત્યારે રોજગાર વિભાગ, માહિતી કચેરી સહિતની ઓફિસમાં હાજર રહેલા અધિકારી અને કર્મચારીની હાજરી ચેક કરી હતી અને તેઓ દ્વારા સરકારી રેકર્ડને રાખવામા આવતું હોય છે તેને પણ ચેક કર્યું હતું. ત્યારબાદ જિલ્લા કલેકટર દ્વારા હાજર રહેલા અધિકારી અને કર્મચારીને જરૂરી માર્ગદર્શન અને સૂચના આપવામાં આવી હતી સાથો સાથ જે અધિકારી અને કર્મચારી ઓફિસ સમય દરમિયાન હાજર ન હતા તેની સામે કાર્યવાહી કરવા માટે પણ કલેક્ટર દ્વારા સૂચના આપવામાં આવેલ છે