મોરબીમાં શ્રાવણ મહિનાના તમામ સોમવાર અને જન્માષ્ટમીએ કતલખાના બંધ રાખવા આદેશ

મોરબી જિલ્લામાં ગેરકાયદેસર કતલખાના બંધ કરવા માટેની હિંદુ સંગઠન દ્વારા છેલ્લા ઘણા સમયથી માંગ કરવામાં આવી રહી છે દરમિયાન મોરબી મહાનગરપાલિકા દ્વારા શ્રાવણ માસને ધ્યાનમાં રાખીને શ્રાવણ મહિનાના તમામ સોમવાર તથા જન્માષ્ટમીના દિવસે મોરબી શહેરી વિસ્તારમાં કતલખાના બંધ રાખવા માટે અને માસ, મચ્છી, મટન અને ચિકનના વેચાણ ઉપર સંપૂર્ણ પ્રતિબંધ મૂકવામાં આવેલ છે અને તેનું જાહેરનામું પ્રસિદ્ધ કરવામાં આવ્યું છે

મોરબી મહાનગરપાલિકાના કમિશનર સંગીતા રૈયાણી દ્વારા શ્રાવણ મહિનાને ધ્યાનમાં રાખીને જાહેરનામું પ્રસિદ્ધ કરવામાં આવ્યું છે જેમાં શ્રાવણ મહિનામાં આવતા સોમવાર એટલે કે તા. 17/8 24/8, 31/8 અને 7/9 ના રોજ તેમજ જન્માષ્ટમીના દિવસે એટલે કે તા. 4/9 ના રોજ મોરબી મહાપાલિકા વિસ્તારની અંદર તમામ કતલખાનાઓ સંપૂર્ણપણે બંધ રાખવા તેમજ આ દિવસ દરમિયાન માસ, મચ્છી, મટન, ચિકનના વેચાણ પર પ્રતિબંધ મૂકવામાં આવ્યો છે અને આ જાહેરનામાની કડકપણે અમલવારી કરવા માટે સંબંધિત વિભાગના અધિકારીઓને જાણ કરવામાં આવેલ છે અને આ જાહેરનામાનો ભંગ કરવામાં આવશે તો જાહેરનામાનો ભંગ કરનારની સામે ધી જીપીએમસી એક્ટ 1949 ની કલમ 329 તથા 336 હેઠળ કાયદાકીય કડક કાર્યવાહી કરવામાં આવશે તેવું અધિકારીએ જણાવ્યું છે