હળવદના કડીયાણા ગામે ગોચરની જમીનમાંથી થતી ગેરકાયદે ખનીજ ચોરી રોકવા સરપંચ-તલાટિએ કરી ટીડીઓ-મામલતદારને રજૂઆત

હળવદ તાલુકાના કડીયાણા ગામે ગોચરની જમીનમાંથી ગેરકાયદે ખનીજ ચોરી કરવામાં આવી રહી છે જેની ગામના લોકોએ ગ્રામપંચાયતમાં લેખિતમાં રજૂઆત કરી હતી તેના આધારે ગ્રામ પંચાયતના સરપંચ અને તલાટી દ્વારા ટીડીઓ અને મામલતદારને લેખિતમાં રજૂઆત કરીને ખનીજ ચોરી અટકાવવા માટેની માંગ કરી છે.

હળવદના કડિયાણા ગામના સરપંચ મુક્તાબેન રમેશભાઈ તથા તલાટી મંત્રી દ્વારા હાલમાં લેખિતમાં ટીડીઓ તથા મામલતદારને ખનીજ ચોરી બાબતે રજૂઆત કરવામાં આવેલ છે જેમાં જણાવ્યુ છે કે, હળવદ તાલુકાના કડિયાણા ગામના સ્થાનિક લોકો દ્વારા તેઓને લેખિત રજૂઆત કરવામાં આવી છે કે સર્વે નંબર 511 માં ગોચરની જમીન આવેલ છે અને ત્યાંથી ગેરકાયદેસર રીતે ખનીજ ચોરી કરવામાં આવી રહી છે અને સરકારી સંપત્તિ તથા ગૌચરની જમીનને મોટા પ્રમાણમાં નુકસાન કરવામાં આવી રહ્યું છે જેથી ખનીજ ચોરી અટકાવવામાં આવે તેવી ગામના લોકો દ્વારા ગ્રામ પંચાયતના સરપંચ અને તલાટી મંત્રીની રજૂઆત કરવામાં આવી છે જેના આધારે ગ્રામ પંચાયતના સરપંચ અને તલાટી દ્વારા ટીડીઓ અને મામલતદારને રજૂઆત કરીને ગોચરની જમીનમાંથી કરવામાં આવતી ખનીજ ચોરીને સદંતર બંધ કરવામાં આવે તેના માટેની રજૂઆત કરવામાં આવેલ છે.