મોરબી મહાનગરપાલિકા અધિકારી 3 વખત હુકમ કર્યો તો પણ સ્ટાફે આરટીઆઇ હેઠળ માંગેલી માહિતી ન આપી !: પરિમલ ઠક્કર

મોરબી મહાનગરપાલિકા પ્રજા પાસે નિયમોની અમલવારી કરાવે છે પરંતુ મહાપાલિકા નિયમોનું પાલન કરતી નથી તેવો આક્ષેપ ભાજપના યુવા આગેવાન દ્વારા કરવામાં આવેલ છે અને તેને જણાવ્યુ છે કે, આરટીઆઈ એક્ટ હેઠળ માહિતી માંગવામાં આવે તો 30 દિવસમાં માહિતી આપવાની હોય પરંતુ આઠ મહિના થઇ ગયા તો પણ માહિતી આપવામાં આવેલ નથી જે આરટીઆઈ એક્ટનું ઉલ્લંઘન કરવા સમાન છે.

મોરબીમાં રહેતા ભાજપના યુવા આગેવાન પરિમલભાઈ ઠક્કરે જણાવ્યુ છે કે, ગત તા. 13/01/2026 ના રોજ મોરબી મહાનગરપાલિકા પાસે વિવિધ મુદ્દાઓને લગતી માહિતી આરટીઆઈ એક્ટ હેઠળ માગેલ હતી, પરંતુ તે માહિતી 30 દિવસ વીતી જવા છતાં મળેલ ન હોય,તા. 16/02/26 ના રોજ પ્રથમ અપીલ દાખલ કરી હતી જેનો તા. 22/03/2026 ના રોજ ડેપ્યુટી કમિશનર દ્વારા માહિતી આપવા હુકમ કરાયેલ હતો, પરંતુ તે હુકમનું સ્ટાફ પાલન કરવામાં આવ્યું નથી અને પ્રથમ અપીલ અધિકારી અને નાયબ મ્યુનિસિપલ કમિશનર દ્વારા તા. 21/05/2026 ના રોજ હુકમની અમલવારી માટે ફરીથી હુકમ કરેલ હતો, તો પણ તે હુકમનું પાલન કરવામાં આવ્યું નથી જેથી તા. 25/07/2026 ના રોજ ફરીથી હુકમની અમલવારી માટે અધિકારી હુકમ કર્યો હતો જો કે તેમના આ હુકમને પણ વર્કશોપ શાખાના જાહેર માહિતી અધિકારી ઘોળીને પી ગયા હોય તેવો ઘાટ જોવા મળી રહ્યો છે ત્યારે વારંવાર ડેપ્યુટી કમિશ્નર હુકમ કરે તો પણ તેના હુકમનું પાલન ન કરીને નીચેના કર્મચારીઓ જાણે કે અધિકારીના હુકમને મજાક સમજતા હોય તેવો ઘાટ સર્જાયો છે. ઉલેખનીય છેકે, અધિકારી એક નહીં પરંતુ 3 વખત હુકમ કરેલ હતો તો પણ તેની અમલવારી નીચેના કર્મચારી દ્વારા કેમ કરવામાં આવતી નથી તે તપાસનો વિષય છે. જેથી અરજદાર દ્વારા વધુ એક વખત લેખિતમાં રજૂઆત કરીને અધિકારીને હુકમ પાલન કરાવી તાત્કાલિક માહિતી અપાવવા માટે માંગ કરવામાં આવેલ છે.