મોરબીના ભરતનગર પાસે પંચર પડેલી કારમાં હવા ભરતા બે યુવાનોને બલેનો ગાડીના ચાલકે હડફેટે લેતા અકસ્માત

મોરબી માળિયા હાઇવે રોડ ઉપર આવેલ ભરતનગર ગામ પાસે કારમાં પંચર પડ્યું હોય બે યુવાન કારના ટાયરમાં હવા ભરતા હતા ત્યારે પાછળથી આવી રહેલ બલેનો ગાડીના ચાલકે બંને યુવાન અને તેની કારને હડફેટે લેતા અકસ્માત થયો હતો જે બનાવમાં બંને યુવાનોને ઇજા થઈ હતી અને કારમાં નુકસાની થઈ હતી જો કે, અકસ્માત સર્જીને બલેનો ગાડીનો ચાલક પોતાનું વાહન લઇને નાસી ગયો હતો જેથી ઇજા પામેલા યુવાને સારવાર લીધા બાદ નોંધાવેલ ફરિયાદ આધારે પોલીસે આરોપીને પકડવા માટે તજવીજ શરૂ કરેલ છે

રાજકોટમાં મેટોડા જીઆઇડીસી ગેટ નં 3 પાસે આવેલ મારુતિ પાર્કમાં રહેતા રાહુલભાઈ કિરણભાઈ સવાસડીયા (25)એ મોરબી તાલુકા પોલીસ સ્ટેશન ખાતે બલેનો કાર નંબર જીજે 4 પી 2419 ના ચાલક સામે ફરિયાદ નોંધાવેલ છે જેમાં તેને જણાવ્યું છે કે, મોરબી માળિયા હાઇવે રોડ ઉપર આવેલ ભારતનગર ગામ પાસેથી ફરિયાદી તથા સાહેદ ચેતનસિંહ ગુલાબસિંહ જાડેજા બંને સ્વિફ્ટ ગાડી નંબર જીજે 3 પીએમ 4004 લઈને પસાર થઈ રહ્યા હતા ત્યારે તેઓની ગાડીમાં પંચર પડી જતા ટાયરમાં તેઓ પંપથી હવા ભરતા હતા દરમિયાન આરોપીએ પોતાના હવાલા વાળી બલેનો ગાડી બેફિકરાયથી ચલાવી હતી અને ફરિયાદી તથા સાહેદને તથા તેઓની કારને હડફેટે લીધા હતા જે બનાવમાં ફરિયાદીને જમણા હાથમાં ઇજા થઈ હતી જ્યારે સાહેદ ચેતનસિંહને ડાબા હાથ તથા છાતીના ભાગે ઇજા થઈ હતી અને કારમાં નુકસાની થયેલ છે જો કે, અકસ્માત સર્જીને બલેનો ગાડીનો ચાલક પોતાનું વાહન લઈને સ્થળ ઉપરથી નાસી ગયેલ હોય હાલમાં યુવાને નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

છરી વડે હુમલો

મોરબીના મકનસર ગામે રહેતા જીતુભાઈ નારણભાઈ જામ નામના યુવાન ઉપર પ્રેમજીનગર વિસ્તારમાં નીતિન પરમાર નામના વ્યક્તિ દ્વારા છરી-ધોકા વડે હુમલો કરી માર મારવામાં આવતા જીતુભાઈને સિવિલે સારવારમાં લઇ જવાયો હતો. જ્યારે મોરબીના વનાળીયા ગામે કરીમભાઇની વાડીએ રહી વાડી વિસ્તારમાં કામ કરતા પરિવારના વિષ્ણુ પપ્પુભાઈ બીલવા નામના ૧૩ વર્ષના બાળકને સાપ કરડી જતા સારવાર માટે સિવિલે લાવવામાં આવ્યો હતો.તેમજ મોરબીના માળિયા હાઇવે ઉપર કે.કે.હોટલ પાસે બોલેરો ચાલકે હડફેટે લેતા કેતનસિંહ ગુલાબસિંહ જાડેજા (૩૫) રહે નાના ઇંટવા તા.પડધરી રાજકોટને ઈજા થઈ હોય અહિંની સિવિલે સારવાર માટે લાવવામાં આવ્યો હતો.બનાવને પગલે તાલુકા પોલીસ મથકના ફિરોજભાઈ સુમરા દ્વારા નોંધ કરીને તપાસ કરવામાં આવી હતી.