મોરબીમાં શ્રી ઉમિયા નવરાત્રિનું 16મું વર્ષ: ગરબાની રમઝટ સાથે સમાજસેવાની સરવાણી
SHARE
JOIN OUR GROUP
મોરબીમાં શ્રી ઉમિયા નવરાત્રિનું 16મું વર્ષ: ગરબાની રમઝટ સાથે સમાજસેવાની સરવાણી
મોરબીમાં શ્રી ઉમિયા નવરાત્રિ મહોત્સવ માત્ર ધાર્મિક અને સાંસ્કૃતિક ઉત્સવ પૂરતો સીમિત ન રહેતા સમાજલક્ષી અને સેવાકીય પ્રવૃત્તિઓ માટે પણ મહત્વપૂર્ણ માધ્યમ બની રહ્યો છે. આ મહોત્સવ દરમિયાન મળતી દાનની રકમમાંથી વિવિધ શૈક્ષણિક, સામાજિક અને સેવાકીય કાર્યોમાં આર્થિક સહયોગ આપવામાં આવે છે.
મોરબી શ્રી ઉમિયા નવરાત્રિ મહોત્સવ દ્વારા શ્રી કડવા પાટીદાર કન્યા કેળવણી મંડળ, મોરબી સંચાલિત શ્રી ઉમા સંસ્કાર ધામ, લજાઈ ખાતે ભોજનાલયના મુખ્ય દાતા તરીકે 51 લાખનું અનુદાન આપવામાં આવ્યું છે. તેમજ અમદાવાદ ખાતે વિદ્યાર્થી ભવનની બીજી વિંગના મુખ્ય દાતા તરીકે પણ 51 લાખનું અનુદાન આપવામાં આવ્યું છે. આ ઉપરાંત મોરબી જિલ્લાના કોઈપણ ગામમાં પટેલ સમાજવાડીના નિર્માણ માટે શ્રી ઉમિયા નવરાત્રિ મહોત્સવ દ્વારા 1,11,111નું કાયમી અનુદાન આપવામાં આવે છે. ટંકારા પટેલ સમાજવાડીના નિર્માણ માટે 11,11,111નું અનુદાન આપવામાં આવ્યું છે. આ ઉપરાંત જિલ્લાના અનેક ગામોમાં પટેલ સમાજવાડી માટે આર્થિક સહયોગ આપવામાં આવ્યો છે.
અનાથ દીકરીઓના શિક્ષણ માટે પણ સહયોગ
ગત વર્ષની જેમ આ વર્ષે પણ શ્રી ઉમિયા નવરાત્રિ મહોત્સવ દ્વારા આઠમની મહાઆરતીના બોલમાંથી પ્રાપ્ત થનારી સમગ્ર રકમનો ઉપયોગ મોરબી જિલ્લાની અનાથ દીકરીઓના ભણતર માટે કરવામાં આવશે. ગત વર્ષે શ્રી ઉમિયા નવરાત્રિ મહોત્સવમાં આઠમની મહાઆરતીમાંથી પ્રાપ્ત રકમમાંથી મોરબી જિલ્લાની 101 અનાથ દીકરીઓને ભણતર માટે 21,000 ની સહાય આપવામાં આવી હતી, એટલે કે કુલ મળીને 21,21,000 ની શૈક્ષણિક સહાય કરવામાં આવી હતી.
16મા વર્ષે ભવ્ય નવરાત્રિ મહોત્સવ
શ્રી ઉમિયા નવરાત્રિ મહોત્સવ દ્વારા આ વર્ષે 15 વર્ષ પૂર્ણ કરીને 16મા વર્ષમાં ભવ્ય નવરાત્રિ મહોત્સવનું આયોજન કર્યું છે મોરબીના લીલાપર કેનાલ રોડ ખાતે આવેલા રામકો રેસીડેન્સી ગ્રાઉન્ડ ખાતે ‘માં ઉમાનું આંગણું’ નામથી નવરાત્રિનું આયોજન થશે. અને 11 થી 19 ઓક્ટોબર સુધી નવરાત્રિ મહોત્સવમાં જાણીતા કલાકારો દ્વારા ગરબાની રમઝટ બોલાવવામાં આવશે. જેમાં ગાયક ઋષભ અગ્રાવત, સાધના ગોસ્વામી, નારાયણ ઠાકર અને પૂનમ ગઢવી સહિતના કલાકારો સંગીત અને ગરબાની પ્રસ્તુતિ આપશે.
