મોરબીમાં ભાવિ ભરથારથી પ્રેગનેટ થયેલ સગીરા અને બાળક સારવાર માટે રાજકોટ ખસેડાયા
SHARE
JOIN OUR GROUP
મોરબીમાં ભાવિ ભરથારથી પ્રેગનેટ થયેલ સગીરા અને બાળક સારવાર માટે રાજકોટ ખસેડાયા
મોરબી નજીકના ગ્રામ્ય વિસ્તારમાં રહેતા અને મજૂરીકામ કરતા પરિવારની સગીરવયની દીકરીએ અહીંની સિવિલ હોસ્પિટલ ખાતે બાળકને જન્મ આપ્યો હતો અને જેથી યુવતીની હાલત નાજુક જણાતા તેણીને વધુ સારવાર માટે હાલ રાજકોટ ખસેડવામાં આવી છે.સૂત્રોમાંથી મળતી માહિતી મુજબ સગીરાની સગાઈ થયેલ છે અને તેના ભાવિ ભરથારથી પ્રેગનેટ થયેલ હોય તેમજ બાળકને જન્મ આપતા હાલ માતા અને પુત્રને વધુ સારવાર માટે રાજકોટ ખસેડાયા છે.
મોરબી પોલીસ સૂત્રો અને હોસ્પિટલ સુત્રોમાંથી મળતી માહિતી મુજબ મોરબીના લીલાપર નજીક રહેતા એક પરિવારની દીકરીની સગાઈ મોરબી નજીકના નાનીવાવડી ગામ પાસે રહેતા યુવાન સાથે થયેલ છે અને એકાદ વર્ષ પહેલાં સગાઈ થયેલ ત્યારે યુવતી સગીરા હતી અને જે દરમિયાન યુવતી અને તેના ભાવિ ભરથાર બંનેના સહવાસથી સગીરા માતા બની હતી અને તેણીએ મોરબીની સિવિલ હોસ્પિટલ ખાતે પુત્રને જન્મ આપ્યો હતો.જોકે ડિલીવરી સમયે સગીરાને આંચકી ઉપડતા હાલ સગીરા અને તેના પુત્રને વધુ સારવાર માટે રાજકોટ ખસેડાયા હોવાનું જાણવા મળેલ છે.બનાવ સંદર્ભે મોરબી સીટી એ ડિવિઝન પોલીસ દ્વારા પ્રાથમિક તપાસ કરવામાં આવી હતી અને બાદમાં બનાવ તાલુકા પોલીસ મથકની હદનો હોવાનું સામે આવતા હાલ મોરબી તાલુકા પોલીસને આ અંગે જાણ કરવામાં આવી છે અને તાલુકા પોલીસ દ્વારા આગળની રાબેતા મુજબની કાર્યવાહી હાથ ધરવામાં આવી હોવાનું પોલીસ સૂત્રોમાંથી જાણવા મળેલ છે.
મારામારીમાં ઈજા
મોરબી નજીકના જાંબુડીયા ગામ પાસે માર્બોમેકસ સીરામીકના ક્વાટર પાસે થયેલ મારામારીના બનાવવામાં ઈજા થતાં કુલદીપ ઓમપ્રકાશ જયસ્વાલ નામના ૨૬ વર્ષના મજૂર યુવાનને સારવારમાં ખસેડાયો હતો.તાલુકા પોલીસ મથકના એ.એમ.જાપડીયા આ અંગે તપાસ ચલાવી રહ્યા છે.જ્યારે મોરબીના ટીંબડી ગામના પાટીયા પાસે આવેલ પાટીદાર ટાઉનશીપ પાસેથી અર્ધ બેભાન હાલતમાં મળી આવેલ આશરે પાંત્રીસેક વર્ષના અજાણ્યા યુવાનને ૧૦૮ વડે અત્રેની સિવિલે સારવારમાં ખસેડાયો હતો જેથી બીટ વિસ્તારના જમાદાર ફિરોજભાઈ સુમરા દ્વારા આ અંગે નોંધ કરી આગળની તપાસ ચલાવવામાં આવી રહી છે.
દવા પી જતા સારવારમાં
મોરબીના વાંકાનેર દરવાજા પાસે આવેલ ભવાની ચોક વિસ્તારમાં રહેતા અકીબશા દિવાન નામનો ૧૭ વર્ષનો યુવાન કોઈ કારણોસર દવા પી ગયો હતો જેથી તેને અત્રેની નક્ષત્ર હોસ્પિટલે સારવાર માટે લાવવામાં આવ્યો હતો.જ્યારે મોરબીના વાવડી રોડ નજીક બાઇક સ્લીપ થઈ જવાના બનેલા અકસ્માત બનાવમાં ઇજાગ્રસ્ત થયેલા સુરેશ લક્ષ્મણભાઈ નકુમ નામના ૪૮ વર્ષના યુવાનને પણ સારવાર માટે લાવવામાં આવ્યો હોય પોલીસે બંને બનાવની નોંધ કરી આગળની તપાસ હાથ ધરેલ છે.
