હળવદમાં ફોન ઉપર ઊંચા આવજે કરેલ વાતનો ખાર રાખીને ત્રણ વ્યક્તિ ઉપર કાર ચડાવીને હત્યા કરવાનો પ્રયાસ

હળવદ નજીક આવેલા કારખાનામાં રહેતા અને કામ કરતા મૂળ ઉત્તરપ્રદેશના યુવાને ફોન ઉપર મહિલા સાથે ઉંચા અવાજે વાત કરી હતી જે બાબતનો ખાર રાખીને તે મહિલાના દીકરા સહિતના કુલ છ વ્યક્તિઓ દ્વારા કારખાનામાં ગેરકાયદે પ્રવેશ કરીને હુમલો કરવામાં આવ્યો હતો અને યુવાનને ઢીકાપાટુનો તથા પાઇપ વડે માથામાં અને શરીરે આડેધડ માર મારવામાં આવ્યો હતો તેમજ આરોપીઓ પૈકીના એક શખ્સે તેના હવાલા વાળી ગાડી ફરિયાદી તથા તેની સાથે રહેલા અન્ય બે વ્યક્તિઓ ઉપર ચડાવી દેવા માટે પ્રયત્ન કર્યો હતો જેથી કરીને ઇજા પામેલા ત્રણ વ્યક્તિઓને સારવાર માટે હોસ્પિટલે ખસેડવામાં આવ્યા હતા અને ત્યારબાદ ભોગ બનેલા યુવાને નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરી છે

જાણવા મળતી માહિતી મુજબ મૂળ ઉત્તરપ્રદેશનો રહેવાસી અને હાલમાં હળવદમાં આવેલ આસ્થા ટેકનો પ્લાસ્ટ નામના કારખાનાના લેબર કવાર્ટરમાં રહેતા અને મજૂરી કામ કરતા મનોજ રામશંકર  યાદવ (52) નામના આધેડે હળવદ તાલુકા પોલીસ સ્ટેશન ખાતે અજય સુરેશભાઈ કુડેચા, હાર્દિક સુરેશભાઈ કુડેચા, સુરેશભાઈ ઉડેચા, શીતલબેન સુરેશભાઈ કુડેચા, સંજયભાઈ ચંદુભાઈ કુડેચા અને વિજયભાઈ ચંદુભાઈ કુડેચા રહે. બધા જ હળવદ વાળાની સામે હળવદ તાલુકા પોલીસ સ્ટેશન ખાતે ફરિયાદ નોંધાવેલ છે જેમાં તેને જણાવ્યું છે કે, આરોપી અજયની માતા શિલ્પાબેન સાથે ફોનમાં તેણે ઊંચા અવાજે વાત કરેલ હતી જે બાબતનો ખાર રાખીને આરોપીઓ આસ્થા ટેક્નો પ્લાસ્ટ કારખાનામાં આવ્યા હતા અને ત્યારે સંજય અને વિજયએ પાઇપ વડે ફરિયાદીને કપાળ, માથા અને પીઠ ઉપર આડેધડ માર્યો હતો તેમજ અન્ય આરોપીઓએ ઢીકાપાટુનો માર મારીને ગાળો આપી હતી અને જાનથી મારી નાખવાની ધમકી આપી હતી તેમજ વિજય કુડેચાએ તેના હવાલા વાળી કાર નંબર જીજે 13 સીસી 2871 ફરિયાદી તથા સાહેદ ઉપર ચડાવીને તેને મારી નાખવા માટેનો પ્રયત્ન કર્યો હતો ત્યારે ઉપેન્દ્રરાયને જમણા પગમાં તેમજ શશીકાંતભાઈને કમરના ભાગે ઇજાઓ થઈ હતી જેથી કરીને આ હુમલામાં ઇજા પામેલ ફરિયાદી સહિતના ત્રણ વ્યક્તિઓને સારવારમાં ખસેડવામાં આવ્યા હતા અને ત્યારબાદ ભોગ બનેલા યુવાને નોંધાવેલ ફરિયાદ આધારે પોલીસે ભારતીય ન્યાય સંહિતા ૨૦૨૩ ની કલમ-૧૦૯, ૧૧૮(૧), ૧૧૭(૨), ૧૧૮(૨), ૧૧૫(૨), ૧૮૯(૨), ૧૯૧(૨), ૧૯૧(૩), ૧૯૦, ૩૫૨, ૩૫૧(૩), ૩૩૨(બી) તથા જી.પી.એકટ કલમ-૧૩૫ મુજબ ગુનો નોંધીને આરોપીઓને પકડવા માટે તજવીજ શરૂ કરી છે