માળીયા (મી)ના બગસરા નજીક પવનચક્કીમાંથી 3.35 લાખના કોપર કેબલ વાયરની ચોરી કરનારા ચાર શખ્સની ધરપકડ

માળીયા મીયાણા તાલુકાના બગસરા ગામની સીમમાં આવેલ સુજલોન કંપનીની પવનચક્કીમાંથી 670 મીટર કોપર કેબલ વાયરની ચોરી કરવામાં આવી હતી જેથી કરીને 3,35,000 ની કિંમતના વાયરની ચોરી થઈ હોવા અંગેની માળિયા તાલુકા પોલીસ સ્ટેશન ખાતે ફરિયાદ નોંધાવવામાં આવી હતી જેના આધારે પોલીસે આરોપીઓને પકડવા માટે તજવીજ શરૂ કરી હતી અને આ ગુનામાં ચોરાઉ મુદામાલ સાથે ચાર શખ્સની પોલીસે ધરપકડ કરીને આગળની કાર્યવાહી હાથ ધરી છે

જાણવા મળતી માહિતી મુજબ માળિયા મીયાણા તાલુકાના વવાણીયા ગામે રહેતા મેઘુભા ભાણજીભા પરમાર (76)એ માળિયા તાલુકા પોલીસ સ્ટેશન ખાતે લાલજીભાઈ મેજરાની, સંજયભાઈ મેજરાની, કિશનભાઇ મેજરાની અને પંકજભાઈ મેજરાની સામે ચોરીની ફરિયાદ નોંધાવેલ છે જેમાં તેમણે જણાવ્યું છે કે ગત તા. 13/10 ના રાત્રીના 9:00 વાગ્યાથી લઈને બીજા દિવસે સવારના 9:00 વાગ્યા સુધીના સમયગાળામાં કોઈપણ સમયે માળિયા તાલુકાના બગસરા ગામની સીમમાં આવેલ સુજલોન કંપનીની પવનચક્કી નંબર વીએમ-75 માં તાળું તોડી પવનચક્કીના 670 મીટર કોપર કેબલ વાયરની ચોરી કરવામાં આવી હતી જેથી કરીને 3,35,000 ની કિંમતના વાયરની ચોરી થઈ હોવાથી પોલીસે ચોરીનો ગુનો નોંધીને આરોપીઓને પકડવા માટે તજવીજ શરૂ કરી હતી અને આ ગુનામાં પોલીસે આરોપી લાલજીભાઈ બાબુભાઈ મેજરાની (24), સંજયભાઈ વશરામભાઈ મેજરાની (22), કિશનભાઇ નાગજીભાઈ મેજરાની (28) અને પંકજભાઈ ચકુભાઈ મેજરાની (21) રહે. બધા લલીયાણા તાલુકો ભચાઉ જિલ્લો કચ્છ વાળાની ધરપકડ કરેલ છે. અને આગળની કાર્યવાહી હાથ ધરી છે