મોરબીના આંદરણા નજીક જીવલેણ અકસ્માત સર્જનાર રિક્ષા ચાલકની ધરપકડ

મોરબીના આંદરણા પાસે ચાર સવારી બાઇકને સીએનજી રીક્ષાના ચાલકે હડફેટે લેતા એક યુવાનને માથાના ભાગે ગંભીર ઇજા થયેલ હતી જેથી તે યુવાનનું મોત નીપજયું હતું જે જીવલેણ અકસ્માતના બનાવમાં પોલીસે આરોપી રિક્ષા ચાલકને પકડીને આગળની કાર્યવાહી કરેલ છે.

હળવદ તાલુકાના રણછોડગઢ ગામે રહેતા ભરતભાઈ કેશુભાઈ ડઢૈયા (30)એ સીએનજી રીક્ષા નંબર જીજે 36 યુ 3661 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવેલ હતી કે, ફરિયાદી તથા તેના ભાઈ સાગરભાઇ તેમજ પ્રવીણભાઈ અને અનિલભાઈ ચારેય વ્યક્તિઓ પ્રવીણભાઈના બાઇક નંબર જીજે 36 એબી 3688 ઉપર રણછોડગઢ ગામથી નીચી માંડલ ગામ તરફ આવી રહ્યા હતા ત્યારે પ્રવીણભાઈ બાઇક ચલાવતા હતા. દરમિયાન આંદરણા ગામની સીમમાં આવેલ લવારિયા તરીકે ઓળખાતી વાડી અને કેશવજીભાઈ મારવાણીયાની વાડી પાસે રોડ ઉપરથી તેઓનું બાઈક પસાર થતું હતું અને સીએનજી રીક્ષાના ચાલકે ફરિયાદીના બાઇકને સામેથી ઠોકર મારતા અકસ્માત થયો હતો જેમાં ફરિયાદી તેમજ સાગરભાઇ, અનિલભાઈ અને પ્રવીણભાઈ ચારેય રસ્તા ઉપર નીચે પડી ગયા હતા ત્યારે ફરિયાદી અને પ્રવીણભાઈ તથા અનિલભાઈને સામાન્ય ઇજાઓ થઈ હતી જોકે સાગરભાઇને માથાના ભાગે ગંભીર ઇજા થતાં તેનું મોત નીપજ્યું હતું જે બનાવ સંદર્ભે હાલમાં યુવાને નોંધાવેલ ફરિયાદ આધારે પોલીસે સીએનજી રીક્ષાના ચાલક સામે ગુનો નોંધી આરોપીને પકડવા માટે તજવીજ શરૂ કરી હતી અને આ ગુનામાં પીએસઆઇ એન.બી. ડાંગર અને તેની ટીમે આરોપી નિલેષ મૈયાભાઈ રાતડીયા (25) રહે. વાંકડા મોરબી વાળાની ધરપકડ કરીને આગળની કાર્યવાહી કરેલ છે.