તારા દીકરાના કારણે અમારી પેઢીમાં નુકસાની આવેલ છે કહીને હળવદમાં વૃદ્ધને બે શખ્સોએ માર માર્યો

હળવદમાં દીકરાની સાથે વેપાર કરતા શખ્સને તેની પેઢીમાં નુકસાની આવેલ હોય જે બાબતનું મન દુઃખ રાખીને વૃદ્ધને પકડી રાખીને ઢીકાપાટુનો માર માર્યો હતો તથા ગાળો આપી હતી અને જાનથી મારી નાખવાની ધમકી આપી હતી જેથી ભોગ બનેલ વૃદ્ધ દ્વારા સારવાર લીધા બાદ હાલમાં બે શખ્સોની સામે હળવદ તાલુકા પોલીસ સ્ટેશન ખાતે ફરિયાદ નોંધાવવામાં આવતા પોલીસે ગુનો નોંધી આરોપીને પકડવા માટે તજવીજ શરૂ કરે છે

હળવદના સરા રોડ ઉપર આવેલ હરીનગર ગોલ્ડ સોસાયટીમાં રહેતા દેવજીભાઈ પરસોત્તમભાઈ લોરીયા (67)એ હળવદ તાલુકા પોલીસ સ્ટેશન ખાતે દલિતચંદ લોરીયા અને મનીષ લોરીયા રહે. બંને અવધ સોસાયટી હળવદ વાળા સામે ફરિયાદ નોંધાવેલ છે જેમાં જણાવ્યું છે કે અગાઉ તેઓનો દીકરો જયેશ આરોપી મનીષ લોરીયા સાથે વેપાર કરતો હોય આરોપી સાથે ફરિયાદીના દીકરા જયેશને પૈસાની લેતી દેતી થયેલ હતી જેનું મન દુઃખ રાખીને ફરિયાદી જ્યારે સરા રોડ ઉપર આવેલ ખોડીયાર ડેરી શાકભાજીના થડા પાસે ઉભા હતા ત્યારે તેને બંને આરોપીઓ જોઈ ગયા હતા જેથી પોતાનું બાઇક ત્યાં ઊભું રાખીને બંને આરોપી ફરીયાદી પાસે આવ્યા હતા અને ત્યાં ફરિયાદીને પકડીને કહ્યું હતું કે “તારા દીકરા જયેશના કારણે અમારી ક્રિષ્ના એન્ટરપ્રાઇઝની પેઢીમાં નુકસાની આવેલ છે” તેમ કહીને ફરિયાદીને ઢીકા પાટુનો માર માર્યો હતો અને ગાળો આપીને જાનથી મારી નાખવાની ધમકી આપેલ હતી જેથી ભોગ બનેલ વૃદ્ધ દ્વારા સારવાર લીધા બાદ હળવદ તાલુકા પોલીસ સ્ટેશન ખાતે ફરિયાદ નોંધાવવામાં આવતા પોલીસે આરોપીને પકડવા માટે તજવીજ શરૂ કરેલ છે.