હળવદના ચરાડવા પાસે ગોડાઉનમાંથી જીરૂના જથ્થાની ચોરીના ગુનામાં પકડાયેલ 4 આરોપીના 1 દિવસના રિમાન્ડ મંજૂર

હળવદના ચરાડવા ગામે ભવાની ઓઈલ મીલના ગોડાઉનમાંથી 10.64 લાખની કિંમતના જીરૂના જથ્થાની ચોરી કરવામાં આવી હતી જે ચોરીના ગુનામાં 4 આરોપીની ધરપકડ કરી હતી અને તેની પાસેથી જીરૂ સહિત કુલ મળીને 12.77 લાખના મુદ્દામાલ કબ્જે કર્યો હતો આ આરોપીઓને રિમાન્ડની માંગણી સાથે કોર્ટમાં રજૂ કરવામાં આવતા કોર્ટે આરોપીના 1 દિવસના રિમાન્ડ મંજૂર કર્યા છે.

મોરબી હળવદ હાઇવે ઉપર આવેલ ચરાડવા ગામે ભવાની ઓઈલ મીલના ગોડાઉનમાં ઘનશ્યામસિંહ દેવુભા પઢિયારએ તેઓનું 102 બાચકામાં 280 મણ જીરૂ ભરીને મૂક્યું હતું જે 10.64 લાખની કિંમતના જીરૂના જથ્થાની અજાણ્યા શખ્સો દ્વારા ચોરી કરવામાં આવી હતી. જેથી ખેડૂતે હળવદ પોલીસ સ્ટેશનમાં ચોરીની ફરિયાદ કરી હતી જે ગુનામાં એલ.સી.બી.ની ટીમે મોરબી નજીક આવેલ આઈ.ટી.આઈ. સામે દેવીપૂજકના ઝૂંપડા નજીક ચેક કર્યું હતું ત્યારે ચોરાઉ જીરૂના જથ્થા સાથે ચાર શખ્સો ત્યાંથી મળી આવ્યા હતા જેથી પોલીસે જીરૂ અને બોલેરો ગાડી સહિત રૂ. 12,77,800 નો મુદામાલ કબ્જે કર્યો હતો અને આરોપી સુરજ ઉર્ફે સુરો સુખાભાઈ સોલંકી, સુનિલ મુકેશભાઈ સોલંકી, ભોલુ ઉર્ફે ભોલો ઠાકરશીભાઈ વિરમગામીયા અને રાહુલ વિજયભાઈ દસકીયાની ધરપકડ કરી હતી અને બાદમાં આરોપી તેમજ મુદામાલ હળવદ પોલીસને સોંપી દેવામાં આવેલ હતો જેથી પોલીસે 7 દિવસના રિમાન્ડની માંગણી સાથે 4 આરોપી કોર્ટમાં રજૂ કરવામાં આવ્યા હતા જો કે, કોર્ટે આરોપીના 1 દિવસના રિમાન્ડ મંજૂર કર્યા છે જેથી પોલીસે બાકીના આરોપીઓને પકડવા માટે અને ચોરીમાં ગયેલ જીરૂના બાચકા પૈકી જે જીરૂનો માલ મળ્યો નથી તેને કબ્જે કરવા માટેની તજવીજ હાથ ધરી છે