મોરબીમાંથી ચોરી કરેલ બાઇક સાથે પોલીસે આરોપીને પકડ્યો

મોરબીમાં એસબીઆઇ બેન્કની સામે આવેલ ત્રિકોણબાગના પાર્કિંગમાં યુવાને પોતાનું બાઈક પાર્ક કરીને મૂક્યું હતું જે બાઈકની ચોરી કરવામાં આવેલ હતું જેથી 50 હજાર રૂપિયાની કિંમતના બાઈકની ચોરીની ફરિયાદ નોંધાયેલ હતી જેના આધારે પોલીસે આરોપીને પકડવા માટે તજવીજ શરૂ કરી હતી અને હાલમાં મોરબી એ ડિવિઝન પોલીસ દ્વારા ચોરાઉ બાઈકની સાથે એક આરોપીને પકડવામાં આવેલ છે.

બનાવની જાણવા મળતી માહિતી મુજબ મોરબીના નવા સાદુળકા ગામે રહેતા પરેશ બાબુલાલ પરેચા (25) નામના યુવાને મોરબી એ ડિવિઝન પોલીસ સ્ટેશન ખાતે વાહન ચોરીની ફરિયાદ નોંધાવી હતી. જેમાં તેને જણાવ્યુ હતુ કે, મોરબીમાં પરાબજાર પાસે આવેલ એસબીઆઇ બેન્કની સામેના ભાગમાં ત્રિકોણબાગના પાર્કિંગમાં તેણે પોતાનું બાઈક નંબર જીજે 36 એએ 4177 પાર્ક કરીને મૂક્યું હતું જે બાઈકની કોઈ અજાણ્યા શખ્સ દ્વારા ચોરી કરવામાં આવી છે. જેથી 50 હજાર રૂપિયાની કિંમતના બાઈકની ચોરી થઈ હોવાની યુવાન દ્વારા મોરબી એ ડિવિઝનમાં ફરિયાદ નોંધાવવામાં આવી હતી. દરમિયાનમાં એ ડિવિઝન પોલીસ મથકનો સ્ટાફ પેટ્રોલિંગમાં હતો અને તેઓ વાવડી ચોકડી પાસે હતા ત્યારે આગળ પાછળ નંબર પ્લેટ વગરના બાઇક સાથે શંકાસ્પદ હાલતમાં એક શખ્સ મળી આવ્યો હતો જેથી તેનું નામ પૂછવામાં આવતા તેને પોતાનું નામ હનીફ કાસમ સંઘવાણી જાતે મિયાણા (30) રહે. સંધવાણી શેરી માળિયા મીયાણા હાલ. સામાકાંઠે માળિયા ફાટક પાસે વાળા હોવાનુ સામે આવ્યું હતું અને તેની પાસે બાઈકના કાગળ હતા નહી. જેથી બાઈકના એન્જિન અને ચેસીસ નંબર આધારે પોકેટ કોપ એપ્લિકેશન વડે ચેક કરતાં તે બાઇક મોરબીના ત્રિકોણબાગમાંથી ચોરી થયું હોવાનું સામે આવ્યું હતું જેથી ચોરાઉ બાઈકની સાથે પોલીસે આરોપીની ધરપકડ કરી હતી અને અન્ય કોઈ ગુનામાં તે સંડોવાયેલ છે કે કેમ તે દિશામાં તપાસ શરૂ કરી છે. અને આગળની તપાસ અશ્વિનભાઈ ઝાપડિયા કરી રહ્યા છે.

મારામારીમા ઈજા

મોરબીના સનાળા રોડ દલવાડી સર્કલ પાસે રહેતા સુમનબેન રાકેશભાઈ કોરડીયા નામની 25 વર્ષની મહિલાને સનાળા રોડ નજીક દલવાડી સર્કલ પાસે મારામારીના બનાવમાં ઇજા થઈ હતી જેથી તેને રાત્રિના 11:00 વાગ્યે સિવિલ હોસ્પિટલે સારવાર માટે લાવ્યા હતા અને આ બનાવની મોરબી એ ડિવિઝન પોલીસને જાણ કરી હતી જેથી કરીને પ્રાથમિક તપાસ એમ.એચ. વાસાણી દ્વારા કરવામાં આવી હતી.