મોરબી પાલિકાના સેનેટરી ઇન્સ્પેક્ટર ઉપર કરાયેલ હુમલાના બનાવમાં બે શખ્સની સામે કાર્યવાહી

મોરબીના રેલ્વે સ્ટેશન રોડ ઉપર નગરપાલિકાના સેનેટરી ઇન્સ્પેક્ટર ડીડીટી પાવડર ભરેલી ગાડી ગોડાઉનમાં ખાલી કરવા માટે ગાડી રિવર્સમાં લેવડાવી રહ્યા હતા દરમિયાન બ્લેક કલરની વર્ના ગાડીમાં બેઠેલા બે શખ્સો દ્વારા તેમને ગાળો આપીને ઝપાઝપી કરવામાં આવી હતી અને ઢીકાપાટુનો માર મારવામાં આવ્યો હતો અને તેઓની કાયદેસરની ફરજમાં રૂકાવટ કરવામાં આવી હતી જેથી ભોગ બનેલા પાલિકાના કર્મચારીએ બે અજાણ્યા શખ્સની સામે ફરિયાદ નોંધાવી હતી જે ગુનામાં બંને આરોપીને પકડવામાં આવેલ છે.

મોરબીના પંચાસર ગામે મોટી ડેલી પાસે રહેતા નિર્મળસિંહ ભરતસિંહ જાડેજા (35) પાલિકામાં કોન્ટ્રાક્ટ બેઝ ઉપર સેનેટરી ઇન્સ્પેક્ટર તરીકે ફરજ બજાવે છે તેણે બ્લેક કલરની વર્ના ગાડી નંબર જીજે 3 એલબી 1319 ના ચાલક અને તેની સાથે ગાડીમાં બેસેલ વ્યક્તિ આમ બે શખ્સોની સામે ફરજમાં રૂકાવટની ફરિયાદ નોંધાવેલ હતી કે, મોરબીના રેલ્વે સ્ટેશન રોડ ઉપર આવેલ રેન બસેરા પાસે ભગુભાઈ ભજીયા વાળાની સામેના ભાગમાં મોરબી નગરપાલિકા વિસ્તારમાં છાંટવા માટે થઈને જે ડીડીટી પાવડર ભરેલી ગાડી આવી હતી તે ગાડીને માલ ગોડાઉનમાં મૂકવા માટે રિવર્સમાં લેવડાવી રહ્યા હતા અને બીજા વાહનો ઉભા રખાવેલ હતા ત્યારે બ્લેક કલરની વર્ના ગાડીમાં આવેલા વાહન ચાલક તથા તેની સાથે બેઠેલા અજાણ્યા શખ્સ દ્વારા ફરિયાદીને ગાળો આપવામાં આવી હતી અને ઝપાઝપી કરીને ઢિકાપાટુનો માર મારવામાં આવ્યો હતો અને તેની કાયદેસરની ફરજમાં રૂકાવટ કરવામાં આવી હતી જેની ફરિયાદ આધારે પોલીસે આરોપીઓને પકડવા માટે ચક્રોગતિમાન કરેલ હતા અને એ ડિવિઝન પોલીસ મથકના પીએસઆઇ સો.એમ. કરકર તથા રાઇટર ધ્રુવરાજસિંહ દ્વારા આરોપી રાયધન દાઉદભાઇ જામ (૨૧) અને લતીફ દાઉદભાઇ જામ (૧૯) રહે. બંને વીસીપરા મોરબી વાળાઓને પકડીને આગળની કાર્યવાહી કરી હતી.