વાંકાનેરના હોલમઢ ગામમાં સામાજિક સુધારણા માટે કોળી સમાજની મિટિંગ મળી

હરીફાઈના યુગમાં સમાજમાં લોકોની આવકો પહેલા હતી તેટલી જ છે, પરંતુ દેખાદેખીનાં કારણે, સમાજના લોકો દ્વારા પ્રસંગોમાં દીન પ્રતિદિન ખર્ચાઓ ખૂબ જ વધી રહ્યાં છે. ત્યારે વાંકાનેરના હોલમઢ ગામમાં સામાજિક સુધારણા માટે કોળી સમાજની મિટિંગ મળી હતી

હોલમઢ ગામનાં કોળી સમાજની આ મિટિંગમાં સમાજમાં ખોટા ખર્ચાઓને કઇ રીતે રોકી શકાય તેની ચર્ચા વિચારણા કરવામાં આવી હતી અને લગ્ન પ્રસંગે તેમજ સામાજિક પ્રસંગોમાં ઘણાં બધાં ફેરફારો કરવામાં આવ્યા હતા. જેમકે લગ્ન પ્રસંગમાં ફટાકડા ફોડવા પર પ્રતિબંધ મુકવામાં આવ્યો હતો. અને જાન આવતી હોય કે જાન જતી હોય તેમાં ડીજે વગાડવા પર પ્રતિબંધ મુકવામાં આવેલ છે અને ૭૦ વર્ષથી વધારે ઉંમરની વ્યક્તિનું મૃત્યુ થાય તો જ મોટું પાણીઢોર કરવું તેમજ ૭૦ વર્ષથી નાની ઉંમરના વ્યક્તિનું મૃત્યુ થાય તો માત્ર બટુક ભોજન કરાવવું. જેવાં અનેક ફેરફારો કરવામાં આવ્યા હતા. અને નિયમોનું ઉલ્લંઘન કરનાર વ્યક્તિઓ સામે રૂપિયા ૩૦ હજાર દંડની જોગવાઈઓ કરવામાં આવેલ હતી