વાંકાનેરમાં ફૂલના હારનો વેપાર કરતાં યુવાનને નજીવી વાતમાં ઢીકાપાટુનો માર મારીને જાનથી મારી નાખવાની ધમકી

વાંકાનેર શહેરમાં પુલ દરવાજા પાસે ફુલહારનો ધંધો કરતા યુવાનને હાર બનાવવા માટેનો ઓર્ડર આપવામાં આવ્યો હતો અને ત્યારબાદ ઓર્ડર મુજબનો હાર લીધેલ ન હતો જેથી યુવાનને 100 રૂપિયાનું નુકસાન થયું હતું અને આ બાબતે યુવાન સાથે બોલાચાલી-ઝઘડો કરીને ઢીકાપાટુનો માર મારીને જાનથી મારી નાખવાની ધમકી આપી હતી જેથી ભોગ બનેલા યુવાને હાલમાં વાંકાનેર સિટી પોલીસ સ્ટેશન ખાતે ફરિયાદ નોંધાવતા પોલીસે ચાર શખ્સોની સામે ગુનો નોંધીને આરોપીઓને પકડવા માટે તજવીજ શરૂ કરેલ છે

વાંકાનેરના આરોગ્ય નગર મેઇન રોડ ઉપર હનુમાન મંદિર સામે રહેતા અને ફૂલહારનો ધંધો કરતા વિવેકભાઈ વિનોદભાઈ કુણપરા (27)એ વાંકાનેર સિટી પોલીસ સ્ટેશન ખાતે મુન્નાભાઈ કારીયા, મુન્નાભાઈનો દીકરો દેવભાઈ, સન્નીભાઈ દિલીપભાઈ અને ધનાભાઈ કારીયા રહે. બધા વાંકાનેર વાળાની સામે ફરિયાદ નોંધાવેલ છે જેમાં તેને જણાવ્યું છે કે પુલ દરવાજા ચોકમાં આવેલ પોતાની કુલહારની દુકાને ફરિયાદી બેઠેલ હતો ત્યારે આરોપી મુન્નાભાઈએ ફરિયાદીને ફૂલનો હાર બનાવવા માટે ઓર્ડર આપેલ હોય તે હાર લેવા માટે થઈને આવ્યા હતા અને ફરિયાદીને ઓર્ડર મુજબનો હાર નહીં બનાવી આપવાનું જણાવી હારની ખરીદી ન કરીને ફરિયાદીને રૂપિયા 100 નું આર્થિક નુકસાન કર્યું હતું અને બેફામ ગાળો આપીને ઢીકાપાટુનો માર માર્યો હતો અને જાનથી મારી નાખવાની ધમકી આપી હતી ત્યારબાદ અન્ય આરોપીઓ પાછળથી ત્યાં આવ્યા હતા અને ફરિયાદીને જાહેરમાં ગાળો આપીને જાનથી મારી નાખવાની ધમકી આપેલ છે જેથી ભોગ બનેલા યુવાન દ્વારા નોંધાવવામાં આવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે