મોરબીમાં નાના વેપારીઓ પાસેથી દિવડાની ખરીદી કરી દિવાળીની સાર્થક ઉજવણી કરતું યંગ ઇન્ડિયા ગ્રુપ

મોરબીના યંગ ઇન્ડિયા ગ્રુપએ એક હૃદયસ્પર્શી સંકલ્પ લીધો “મોલ નહિ, ઑનલાઈન નહિ… મનથી ખરીદી!” આ વિશેષ અભિયાન અંતર્ગત યંગ ઇન્ડિયા ગ્રુપના સભ્યોએ શહેરના નહેરુ ગેટ સહિતના બજાર વિસ્તારોમાં પાથરણા, રેંકડી અને કેબિન ધરાવતા નાના ધંધાર્થીઓ પાસેથી જ દિવાળીની ખરીદી કરી. દિવડા, ફૂલહાર, તોરણ, ઘર સુશોભનની વસ્તુઓ જેવી ચીજવસ્તુઓ સીધી આ સામાન્ય વર્ગના વેપારીઓ પાસેથી લઈ તેમના ઘરમાં પણ દિવાળીના દીપ પ્રગટાવ્યા છે. આ અભિયાનનો હેતુ એ હતો કે નાના વેપારીઓને સ્વનિર્ભર બનવાની તક આપવી, અને લોકોને સમજાવવું કે સાચી દિવાળી તે જ, જયાં ખુશી વહેંચાય. યંગ ઇન્ડિયા ગ્રુપના દેવેનભાઈ રબારીએ જણાવ્યું કે “દિવાળી એ માત્ર ખરીદીનો નહીં, પરંતુ સહકારનો તહેવાર છે.”