મોરબી સિવિલના પાર્કિંગમાંથી ચોરી કરેલા બાઇક સાથે આરોપીની ધરપકડ

મોરબી સિવિલ હોસ્પિટલના પાર્કિંગમાંથી બાઇકની ચોરી કરવામાં આવી હતી જે ચોરાઉ બાઈક સાથે વાવડી રોડ ઉપરથી એ ડિવિઝન પોલીસ દ્વારા રીઢા ચોરને પકડવામાં આવ્યો છે અને ચોરાઉ બાઈક પણ તેની પાસેથી કબજે લેવામાં આવ્યું છે અને આગળની કાર્યવાહી હાથ ધરી છે.

મોરબીમાં નવયુગ સ્કૂલની પાછળના ભાગમાં આવેલ વિઠ્ઠલનગર બ્લોક નં-56 માં રહેતા રાજનભાઈ અરૂણભાઇ સાવલિયા (27) નામના યુવાને મોરબી એ ડિવિઝન પોલીસ સ્ટેશન ખાતે અજાણ્યા શખ્સની સામે બાઇક ચોરીની ફરિયાદ નોંધાવી હતી જેમાં તેને જણાવ્યુ હતું કે, મોરબી સિવિલ હોસ્પિટલના પાર્કિંગમાં તેને પોતાનું બાઈક નંબર જીજે 3 ડીએફ 0477 પાર્ક કરીને મૂક્યું હતું જે 50,000 રૂપિયાની કિંમતનું બાઈક કોઈ અજાણ્યા શખ્સ દ્વારા ચોરી કરવામાં આવેલ છે જેથી કરીને પોલીસે ચોરીનો ગુનો નોંધીને આરોપીને પકડવા માટે તજવીજ શરૂ કરી હતી દરમિયાન એ ડિવિઝન પોલીસ વાવડી રોડ ઉપર આવેલ કપિલા હનુમાન મંદિર પાસે હતી ત્યારે ત્યાંથી શંકાસ્પદ હાલતમાં બાઈક લઈને નીકળેલા શખ્સને રોકીને તેની પાસેથી બાઈકના કાગળો માંગવામાં આવ્યા હતા ત્યારે તેની પાસે બાઈકના કાગળો ન હતા અને સંતોષકારક જવાબ મળ્યો ન હતો જેથી પોકેટ કોપથી સર્ચ કરવામાં આવતા આ બાઇક ચોરી કર્યું હોવાનું સામે આવ્યું હતું જેથી પોલીસે તેની વધુ પૂછપરછ કરતા આ બાઈક તેણે સિવિલ હોસ્પિટલના પાર્કિંગમાંથી ચોરી કરી હોવાનું સામે આવ્યું હતું જેથી હાલમાં પોલીસે ચોરાઉ બાઈક સાથે આરોપી પ્રકાશ ચંદુભાઈ નગવાડીયા રહે. ચીખલી તાલુકો માળીયા વાળાની ધરપકડ કરેલ છે અને આ શખ્સ અગાઉ જુગાર, ચોરી, દેશી દારૂ, મારામારીના ગુનામાં પકડાયો હોવાનું પોલીસ પાસેથી જાણવા મળેલ છે.