મોરબીમાં આમ આદમી પાર્ટીના કાર્યકરને ફેસબુકમાં ફેક આઈડી બનાવીને ગાળો લખનાર આપના સસ્પેન્ડ ઉપપ્રમુખ સામે ગુનો નોંધાયો

મોરબીમાં રહેતા આમ આદમી પાર્ટીના સક્રિય કાર્યકરને સોશિયલ મીડિયાના ફેસબુકના પ્લેટફોર્મ ઉપર ફેક આઈડી બનાવીને એક શખ્સ દ્વારા જ્ઞાતિ પ્રત્યે અપમાનિત કરીને અભદ્ર ગાળો આપવામાં આવી હતી તેમજ સાહેદોને પણ ગાળો આપીને કોમેન્ટો લખવામાં આવી હતી જેથી ભોગ બનેલ યુવાન દ્વારા મોરબી એ ડિવિઝન પોલીસ સ્ટેશન ખાતે ફરિયાદ નોંધાવવામાં આવતા પોલીસે હાલમાં આઈટી એક્ટ સહિતની કલમો હેઠળ ગુનો નોંધીને આરોપીને પકડવા માટે તજવીજ શરૂ કરેલ છે.

મૂળ લાલપર ગામના રહેવાસી અને હાલમાં મોરબીમાં સબજેલની સામેના ભાગમાં આવેલ વણકરવાસમાં રહેતા આમ આદમી પાર્ટીના સક્રિય કાર્યકર ભગવાનજીભાઈ બાબુભાઈ સાવરીયા (30)એ મોરબી એ ડિવિઝન પોલીસ સ્ટેશન ખાતે ચંદ્રકાંત માવજીભાઈ વિરમગામ રહે. 101 શિવ પેલેસ એપાર્ટમેન્ટ શ્યામ સોસાયટી અવની ચોકડી પાસે મોરબી વાળાની સામે ફરિયાદ નોંધાવેલ છે જેમાં જણાવ્યું છે કે, આરોપીએ પોતાના મોબાઈલ ફોનમાં ગોપાલ પટેલ નામની ફેસબુક ઉપર ફેક આઈડી બનાવી હતી અને તે આઈડી પરથી ફરિયાદીને જ્ઞાતિ પ્રત્યે અપમાનિત કરી અભદ્ર ગાળો લખી હતી તથા સાહેદોને પણ ગાળો લખીને કોમેન્ટ કરી હતી જેથી ભોગ બનેલ યુવાને નોંધાવેલ ફરિયાદ આધારે પોલીસે હાલમાં આઈટી એક્ટ સહિતની કલમો હેઠળ ગુનો નોંધીને આરોપીને પકડવા માટે તજવીજ શરૂ કરેલ છે.

એક બોટલ સાથે એક પકડાયો

મોરબીના મહેન્દ્રનગર ગામે શીતળા માં વિસ્તારમાં જવાના રસ્તા ઉપરથી પસાર થઈ રહેલા શખ્સને રોકીને પોલીસે ચેક કર્યો હતો ત્યારે તેની પાસેથી દારૂની નાની એક બોટલ મળી આવી હતી જેથી પોલીસે 80 રૂપિયાની કિંમતની દારૂની બોટલ સાથે આરોપી વિજયભાઈ બાબુભાઈ ઝાલા (35) રહે. મહેન્દ્રનગર વાળાની ધરપકડ કરી હતી અને તેની સામે બી ડિવિઝન પોલીસ સ્ટેશન ખાતે ગુનો નોંધાયો છે.