હળવદના જૂના દેવળીયા ગામે ઘરેથી આંતર જિલ્લા દારૂના ગુનામાં સંડોવાયેલ રીઢો આરોપી ઝડપાયો

આંતર જિલ્લા દારૂના 6 ગુનામાં છેલ્લા ઘણા સમયથી નાસતો ફરતો આરોપી હળવદ તાલુકાના જુના દેવડીયા ગામે પોતાના ઘરે હોવાની એલસીબીની ટીમને હકીકત મળી હતી જેના આધારે એલસીબીની ટીમ દ્વારા ત્યાંથી આરોપીને ઝડપી લઈને આગળની કાર્યવાહી હાથ ધરવામાં આવી છે.

મોરબી જિલ્લામાં જુદા જુદા ગુનામાં સંડોવાયેલ નાસતા ફરતા આરોપીઓને પકડી પાડવા માટે થઈને અધિકારી દ્વારા એલસીબીની ટીમને સૂચના આપવામાં આવી હોય હાલમાં એલસીબીની ટીમ જુદા જુદા ગુનામાં નાસતા ફરતા આરોપીઓને પકડવા માટે થઈને તજવીજ કરી રહી છે તેવામાં માળિયા મીયાણા તાલુકા પોલીસ સ્ટેશન ખાતે નોંધાયેલ દારૂના ગુનામાં છેલ્લા 9 મહિનાથી નાસતા ફરતા આરોપી વિજય જયંતીભાઈ અઘારાને પકડવા માટે તજવીજ કરવામાં આવી રહી હતી દરમિયાન એલસીબીની ટીમને હકીકત મળી હતી કે આરોપી હળવદ તાલુકાના જુના દેવળીયા ગામે આવેલ તે ઘરે  છે જેથી એલસીબીની ટીમ તાત્કાલિક સ્થળ ઉપર પહોંચી હતી અને ઘરમાંથી આરોપી વિજય જયંતીભાઈ અઘારા (42) રહે. જુના દેવળીયા તાલુકો હળવદ વાળાની ધરપકડ કરવામાં આવી હતી. વધુમાં પોલીસ પાસેથી મળતી વિગત પ્રમાણે આરોપી સામે માળિયા, વાંકાનેર સીટી, હળવદ, સુરેન્દ્રનગર જિલ્લાના લખતર, દાહોદ જિલ્લાના ચાકલીયા અને વાવ થરાદ જિલ્લાના માવસરી પોલીસ સ્ટેશનમાં દારૂના જુદા જુદા છ જેટલા ગુના નોંધાયેલા છે અને તેમાં આરોપીને પકડવાનો બાકી હોય હાલમાં રીઢા આરોપીને પકડીને પોલીસે આગળની કાર્યવાહી હાથ ધરી છે.