વાંકાનેરના વસુંધરા ગામે ચાલતી ગેરકાયદે પ્રવૃતિઓ બંધ કરાવવા રજૂઆતો કરનારા ગામના સરપંચ અને તેના પુત્ર ઉપર 4 શખ્સોએ કર્યો જીવલેણ હુમલો

વાંકાનેરના વસુંધરા ગામે ચાલતી ગેરકાયદે પ્રવૃતિઓ બંધ કરાવવા માટે ગામના સરપંચ દ્વારા લાગતા વળગતા વિભાગમાં લેખિત તથા મૌખિક રજૂઆતો કરવામાં આવી હતી જે બાબતનો ખાર રાખીને ગામના 4 શખ્સો દ્વારા સરપંચ એક્ટિવા લઈને જતા હતા ત્યારે તેઓની ઉપર હુમલો કરવામાં આવેલ હતો અને તેઓને માર મારીને નેશનલ હાઈવે ઉપર ફેંકી દીધા હતા તથા સરપંચના દીકરા સહિત બે વ્યક્તિ તેને શોધવા માટે ગયેલ હતા ત્યારે તેઓની ઉપર પણ કુહાડી, લોખંડના પાઇપ અને ધોકા વડે હુમલો કરીને તેઓને પણ માર માર્યો હતો જેથી ઈજાગ્રસ્તોને સારવાર માટે હોસ્પિટલે લઈ ગયા હતા અને આ બનાવ સંદર્ભે હાલમાં સરપંચના દીકરાએ નોંધાવેલ ફરિયાદ આધારે પોલીસે ગુનો નોધીને આરોપીને પકડવા માટે તજવીજ શરૂ કરેલ છે

વાંકાનેરના વસુંધરા ગામના સરપંચના દીકરા જીવનદીપ ધીરુભાઈ ડાંગર (36)એ હાલમાં વાંકાનેર તાલુકા પોલીસ સ્ટેશન ખાતે લાલાભાઇ સામતભાઈ સરૈયા, ગોપાલભાઈ લાલાભાઇ સરૈયા, સુરેશભાઈ રેવાભાઇ સરૈયા અને શૈલેષભાઈ રેવાભાઇ સરૈયા રહે. બધા વસુંધરા ગામ વાળા સામે ફરિયાદ નોંધાવેલ છે જેમાં જણાવ્યું છે કે તેઓના પિતા વસુંધરા જાલસીકા સંયુક્ત ગ્રામ પંચાયતના સરપંચ છે અને તેઓના પિતાએ વસુંધરા ગામમાં ચાલતી ગેરકાયદે પ્રવૃત્તિઓ વિરુદ્ધ લાગતા વળગતા વિભાગમાં લેખિત અને મૌખિક રજૂઆતો કરી હતી અને તે બાબતનો ખાર આરોપીઓએ ગત તા. 9/9 ના રોજ સાંજના સમયે ફરિયાદી પોતાનું એકટીવા લઈને જાલસીકાથી રાજકોટ તરફ ઘરે જતા હતા ત્યારે જીવાપર ગામના પાટીયા પાસે ફરિયાદીના પિતાના એકટીવા સાથે વાહન અથડાવીને તેના ઉપર હથિયાર વડે હુમલો કર્યો હતો અને ફરિયાદીના પિતાને હાઇવે ઉપર નાખીને ભાગી ગયા હતા.

ત્યાર બાદ ફરિયાદી તથા સાહેદ એભલભાઈ કાર નંબર જીજે 3 સી ડબલ્યુ 5526 લઈને ફરિયાદીના પિતાને શોધવા માટે તેને નીકળ્યા હતા અને વસુંધરા ગામે આરોપી લાલાભાઇ દૂધ સહકારી મંડળી એ બેઠેલ હોય તેને ફરિયાદીએ પોતાના પિતા વિશે પૂછતા આરોપીએ કહ્યું હતું કે “તારા બાપને મારીને નાખી દીધો છે જાવ ગોતી લો” અને ત્યાર બાદ ગાળો આપીને બોલાચાલી ઝઘડો કર્યો હતો તેમજ સુરેશભાઈએ કુહાડીનો હા મારીને સાહેદ એભલભાઈને માથામાં ઇજા કરી હતી જ્યારે ગોપાલભાઈએ લાકડી વડે એભલભાઈને મારમાર્યો હતો જેથી ફરિયાદી તેઓને બચાવવા માટે વચ્ચે પડતાં આરોપી લાલાભાઇએ લોખંડના પાઇપ વડે ફરિયાદીને માર માર્યો હતો અને શૈલેષભાઈએ લાકડી વડે ફરિયાદી તથા સાહેદને માર મારીને ઇજાઓ કરી હતી.

દરમ્યાન ફરિયાદી અને સાહેદે ત્યાંથી ભાગવા જતા લાલાભાઇ અને સુરેશભાઈ લોખંડના પાઇપ અને કુહાડી લઇને ફરિયાદી તથા સાહેદની પાછળ આવ્યા હતા અને કહ્યું હતું કે, “આના બાપને તો મારીને નાખી દીધો આય નાગના બચ્ચા છે, આમને પણ પતાવી દો” આમ જાનથી મારી નાખવાની ધમકી આપી હતી જો કે, એભલભાઈ ત્યાંથી ભાગી ગયા હતા પછી ફરિયાદીને સુરેશભાઈએ કુવાડીનો બુંધરાવટીનો ઘા પગના ભાગે મારીને નીચે પાડી દીધા હતા અને લાલાભાઇએ ફરિયાદીને મારી નાખવાના ઇરાદે પાઇપના ઉપરા છાપરી માથાના ભાગે ઘા માર્યા હતા જેથી ઇજા પામેલા બંને વ્યક્તિને સારવાર માટે હોસ્પિટલે લઈ ગયા હતા અને બાદમાં યુવાને નોંધાવેલ ફરિયાદ આધારે પોલીસે ચાર શખ્સોની સામે ગુનો નોંધીને આરોપીને પકડવા માટે તજવીજ શરૂ કરેલ છે