રમત ગમત ક્ષેત્ર કારકિર્દી બનાવવા ખેલાડીઓ માટે પ્રથમ પગથિયું ખેલ મહાકુંભ: અંજુ શર્મા

મોરબી જિલ્લામાં ખેલ મહાકુંભ 2026માં વધુમાં વધુ ખેલાડીઓ જોડાય તે માટે તંત્ર દ્વારા પ્રયાસો કરવામાં આવી રહ્યા છે. ત્યારે આંતરરાષ્ટ્રીય કક્ષાએ રાઈફલ શૂટિંગમાં દેશનું પ્રતિનિધિત્વ કરી ચૂકેલા અંજુ શર્માની આજે મોરબી કમલમ કાર્યાલય ખાતે પત્રકાર પરિષદ યોજાઇ હતી અને તેઓએ મોરબી જિલ્લામાંથી વધુમાં વધુ ખેલાડીઓ ખેલ મહાકુંભમાં રજિસ્ટ્રેશન કરાવે તેના માટે અપીલ કરી છે. અને ખેલ મહાકુંભ માટે ઓનલાઈન રજિસ્ટ્રેશનની અંતિમ તા 22 સપ્ટેમ્બર છે.

ગુજરાત સરકાર દ્વારા ખેલાડીઓને પોતાની પ્રતિભા દર્શાવવા માટે ખેલ મહાકુંભ 2026 નું આયોજન કરવામાં આવી રહ્યું છે. આ વર્ષે વિવિધ રમતોમાં ખેલાડીઓ ભાગ લઈ શકશે અને શાળા, તાલુકા, જિલ્લા સહિત વિવિધ કક્ષાએ સ્પર્ધાઓ યોજાશે. મોરબી જિલ્લામાં પણ ખેલાડીઓમાં ખેલ મહાકુંભને લઈને ઉત્સાહ જોવા મળી રહ્યો છે. ત્યારે આંતરરાષ્ટ્રીય રાઈફલ શૂટરે ખેલાડીઓને વધુમાં વધુ સંખ્યામાં રજિસ્ટ્રેશન કરાવીને સ્પર્ધામાં ભાગ લેવા અપીલ કરી છે. ખેલ મહાકુંભમાં ભાગ લેવા ઇચ્છતા ખેલાડીઓ માટે ઓનલાઈન રજિસ્ટ્રેશનની પ્રક્રિયા ચાલી રહી છે. અને 22 સપ્ટેમ્બર 2026 સુધી રજિસ્ટ્રેશન કરી શકાશે. ઓપન કેટેગરી અને કોલેજના વિદ્યાર્થીઓ ઓનલાઈન પોર્ટલ અથવા પોતાની કોલેજ મારફતે રજિસ્ટ્રેશન કરી શકે છે. રમતગમત ક્ષેત્રે પોતાની પ્રતિભા અને કૌશલ્ય દર્શાવવા માંગતા મોરબી જિલ્લાના ખેલાડીઓ માટે આ એક મહત્વપૂર્ણ તક છે. તેવામાં મોરબી જિલ્લા ભાજપ કમલમ કાર્યાલય ખાતે આજે મોરબી જિલ્લા યુવા ભાજપ સ્પોર્ટ્સ સેલના ઇન્ચાર્જ તેમજ ઇન્ટરનેશનલ શૂટિંગ પ્લેયર અંજુ શર્માની પત્રકાર પરિષદ યોજાઇ હતી જેમાં તેમણે જણાવ્યું હતું કે ખેલ મહાકુંભ એ માત્ર રમતગમત નથી પરંતુ જે ખેલાડીઓ રમત ગમત ક્ષેત્ર પોતાની કારકિર્દી બનાવવા માંગતા હોય તેના માટેનું પ્રથમ પગથિયું છે અને ખેલ મહાકુંભમાં વિજેતા બનેલા ખેલાડીઓને આગળ વધવા માટે સરકાર દ્વારા તેનો તમામ પ્રકારનો ખર્ચ ઉઠાવવામાં આવતો હોય છે