વાંકાનેરના રંગપર પાસેથી અજાણી મહિલા અને હળવદમાંથી અજાણ્યા યુવાનનો મૃતદેહ મળી આવતા તપાસ શરૂ

વાંકાનેરના રંગપર ગામની સીમમાં કારખાનાની દિવાલ પાસેથી અજાણી 35 થી 40 વર્ષની મહિલાની કોહવાઈ ગયેલી હાલતમાં લાશ મળી આવી હતી જયારે હળવદમાં ભવાનીનગર ઢોરો વિસ્તારમાં તાલુકા સ્પોર્ટ સંકુલ સામેના ભાગમાંથી કોઈ અજાણ્યા 30 થી 35 વર્ષના યુવાનનો મૃતદેહ મળી આવ્યો હતો જે બંને બનાવની પોલીસે નોંધ કરીને આગળની કાર્યવાહી હાથ ધરી છે. અને મૃતક વ્યક્તિઓના વાલી વારસને શોધવા માટેની તજવીજ ચાલી રહી છે.

વાંકાનેર તાલુકાના રંગપર ગામની સીમમાં ગ્રીન વિટેક કારખાનાની દિવાલ પાસેથી કોઈ અજાણી 35 થી 40 વર્ષની મહિલાની કોહવાઈ ગયેલી હાલતમાં લાશ મળી આવી હતી જેથી આ બનાવની પોલીસને જાણ કરવામાં આવતા તાત્કાલિક પોલીસની ટીમ ઘટના સ્થળે પહોંચી હતી અને મૃતક મહિલાના મૃતદેહને પીએમ માટે હોસ્પિટલે ખસેડવામાં આવ્યો હતો અને મૃતક મહિલા કોણ છે તે શોધવાની દિશામાં પોલીસ દ્વારા આગળની તપાસ હાથ ધરવામાં આવી છે આ અંગેની આગળની વધુ તપાસ વાંકાનેર તાલુકા પોલીસ સ્ટેશનના પીએસઆઈ ડી.વી.ખાંભલા ચલાવી રહ્યા છે

હળવદમાં ભવાનીનગર ઢોરો વિસ્તારમાં તાલુકા સ્પોર્ટ સંકુલ સામેના ભાગમાંથી કોઈ અજાણ્યા 30 થી 35 વર્ષના યુવાનનો મૃતદેહ મળી આવ્યો હતો જેથી આ બનાવની અશ્વિનભાઈ બાબુભાઈ ડાભી (34) પોલીસને જાણ કરી હતી અને મૃતક યુવાનના મૃતદેહને પીએમ માટે હળવદની સરકારી હોસ્પિટલ ખાતે લઈને આવ્યા હતા અને આ યુવાનનું હાર્ટ અટેકથી મોત થયું હોવાનું પ્રાથમિક તપાસમાં સામે આવ્યું છે જે બનાવની પોલીસે નોંધ કરીને આગળની કાર્યવાહી કરેલ છે અને મૃતક યુવાન કોણ છે તે અંગેની તપાસ શરૂ કરી છે.