મોરબીના ઊંચી માંડલ નજીક ટ્રક ટ્રેલરના ચાલકે બાઇકને હડફેટે લેતા યુવાનનું મોત

મોરબીના ઊંચી માંડલથી તળાવિયા શનાળા ગામ તરફ જવાના રસ્તા ઉપરથી યુવાન બાઈક લઈને વાડીએ જઇ રહ્યો હતો ત્યારે તેના બાઇકને ટ્રક ટ્રેલરના ચાલકે હડફેટે લીધું હતું જેથી અકસ્માતનો બનાવ બન્યો હતો આ બનાવમાં યુવાનને માથા અને મોઢાના ભાગે ઇજા થઈ હોવાથી તેનું મોત નીપજયું હતું અને આ બનાવ સંદર્ભે મૃતક યુવાનના બનેવી દ્વારા નોંધાવવામાં આવેલ ફરિયાદ આધારે પોલીસે ટ્રક ટ્રેલરના ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

મોરબીના ત્રાજપર વિસ્તારમાં પેટ્રોલ પંપની પાછળના ભાગમાં રહેતા સંતોષભાઈ શામજીભાઈ જંજવાડીયા (30)એ હાલમાં ટ્રક ટ્રેલર નંબર આરજે 19 જીએફ 5548 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યું છે તે મોરબીના ઊંચી માંડલ ગામની સીમમાંથી તળાવિયા સનાળા ગામ તરફ જવાના રસ્તા ઉપર આવેલ એકોર્ડ સિરામિક કારખાના પાસે રોડ ઉપરથી તેઓના સાળા હિતેશભાઈ રાજુભાઇ ઠાકોર (23) રહે. મૂળ મહેસાણા વાળા બાઈક નંબર જીજે 36 એબી 428 લઈને પસાર થઈ રહ્યા હતા અને વાડીએ જતાં હતા ત્યારે તેઓના બાઈકને ટ્રક ટ્રેકરના ચાલકે હડફેટે લેતા અકસ્માત થયો હતો જે બનાવમાં હિતેશભાઈને માથા અને મોઢાના ભાગે ગંભીર ઇજા થઈ હોવાથી તેઓનું મોત નીપજ્યું હતું આ બનાવ સંદર્ભે મૃતક યુવાનના બનેવીએ નોંધાવેલ ફરિયાદ આધારે પોલીસે ટ્રક ટ્રેલરના ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે