મોરબી નજીક જેસીબીના ચાલકે બાઇકને હડફેટે લેતા ઇજા પામેલા યુવાનનો પગ કાપવો પડ્યો: ગુનો નોંધાયો

મોરબીના જેતપર રોડ ઉપર આવેલ રંગપર ગામની સીમમાં ઓમ મિનરલ પાસેથી પસાર થઈ રહેલા બાઇક ચાલકને જેસીબીના ચાલકે હડફેટે લીધું હતું જેથી કરીને અકસ્માતનો બનાવ બન્યો હતો જેમાં બાઈક ઉપર જઈ રહેલા યુવાનના પગે ગંભીર ઈજા થઈ હોવાથી જમણો પગ ગોઠણથી ઓપરેશન કરીને કાપવો પડેલ છે અને હાલમાં આ અકસ્માતના બનાવ સંદર્ભે ઇજાગ્રસ્ત યુવાનના ભાઈએ જેસીબીના ચાલક સામે ફરિયાદ નોંધાવતા મોરબી તાલુકા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

બનાવની જાણવા મળતી માહિતી મુજબ મૂળ એમપીના રહેવાસી અને હાલમાં મોરબીના ટિંબડી પાટીયા પાસે અમૃત સિમેન્ટ કારખાનામાં રહેતા અને કામ કરતા મકનભાઈ કિશનભાઇ નીનામા જાતે આદિવાસી (૨૩)એ મોરબી તાલુકા પોલીસ સ્ટેશન ખાતે જેસીબી નંબર જીજે ૧૨ એએમ ૧૪૭૬ ના ચાલક સામે ફરિયાદ નોંધાવી છે જેમાં તેને જણાવ્યુ છે કે, મોરબી તાલુકાના રંગપર ગામની સીમમાં કારખાના પાસેથી તેનો ભાઈ ગોબરીયાભાઈ કિશનભાઇ નીનામા (૨૮) બાઈક નંબર એમપી ૪૫ એમએન ૫૭૩૯ લઈને પસાર થઈ રહ્યો હતો ત્યારે જેસીબીના ચાલકે તેના બાઇકને હડફેટે લેતા અકસ્માતનો બનાવ બન્યો હતો અને અકસ્માતના આ બનાવમાં ફરિયાદીના ભાઈ ગોબરીયાભાઈ કિશનભાઇ નીનામાને શરીરે અને જમણા પગમાં ગંભીર ઇજા થઈ હતી જેથી કરીને તેને સારવાર માટે હોસ્પિટલે લઇ ગયા હતા અને સારવાર દરમિયાન ગોબરીયાભાઈના જમણા પગનું ઓપરેશન કરીને ગોઠણથી નીચેના પગને કાપવો પડેલ છે અને જમણા હાથની આંગળીમાં પણ ફ્રેકચર જેવી ઈજા થયેલ છે અને અકસ્માત સર્જીને જેસીબીનો ચાલક પોતાનું વાહન છોડીને નાસી ગયો હતો અને અકસ્માતના આ બનાવ સંદર્ભે હાલમાં ઇજાગ્રસ્ત યુવાનના ભાઈ દ્વારા મોરબી તાલુકા પોલીસ સ્ટેશન ખાતે ફરિયાદ નોંધાવવામાં આવતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે અને આ બનાવની આગળની વધુ તપાસ મોરબી તાલુકા પોલીસ સ્ટેશનના હેડ કોન્સ્ટેબલ જે.બી. પરમાર ચલાવી રહ્યા છે