ટંકારા નજીક કરવામાં આવેલ 90 લાખની લૂંટના ગુનામાં એક કારખાનેદારની ધરપકડ: તપાસનો ધમધમાટ

ટંકારા નજીક ખજુરા હોટલ પાસે કારને ટક્કર મારીને આંગડિયા પેઢીના માલિક પાસેથી રોકડા 90 લાખની લૂંટ કરવામાં આવી હતી. જે ગુનામાં બે આરોપીને પકડવામાં આવેલ છે તે બંને આરોપીઓ રિમાન્ડ ઉપર છે તેવામાં લૂંટની ઘટનાને અંજામ આપતા પહેલા પડાયેલ બંને આરોપી સહિત અન્ય આરોપીઓ જે જગ્યાએ રોકાયેલ હતા તે કારખાનના માલિકની ધરપકડ કરીને પોલીસે આગળની કાર્યવાહી કરેલ છે.

રાજકોટથી આંગડિયા પેઢીના માલિક ગત બુધવારે બપોરના ત્રણેક વાગ્યાના અરસામાં રાજકોટ બાજુથી કારમાં રોકડા રૂપિયા 90 લાખ લઈને મોરબી આવી રહ્યા હતા ત્યારે તેમની કાર નંબર જીજે 3 એનકે 3502 નો પીછો કરતી પોલો અને બલેનો કારના ચાલકોએ રોકડા રૂપિયા 90 લાખની લૂંટ કરી હતી જેથી કરીને આંગડિયા પેઢીના સંચાલક નિલેષભાઇ ભાલોડીએ ટંકારા તાલુકા પોલીસ સ્ટેશન ખાતે ફરિયાદ નોંધાવેલ હતી જેના આધારે પોલીસે અગાઉ આરોપી અભિભાઇ લાલાભાઈ અલગોતર અને અભીજીતભાઇ ભાવેશભાઇ શાર્ગવની ધરપકડ કરી હતી અને તે બંને આરોપી હાલમાં રિમાન્ડ ઉપર છે. જો કે, આ ગુનામાં આરોપી હીતેષભાઇ પાંચાભાઇ ચાવડા, નિકુલભાઇ કાનાભાઇ અલગોતર, દર્શીલ ભરવાડ, કાનો આહીર અને એક અજાણ્યો શખ્સ આમ પાંચ આરોપીઓને પકડવા માટે તજવીજ ચાલી રહી છે તેવામાં ટંકારા પોલીસે દિગ્વિજય અમરશીભાઈ ઢેઢી પટેલ (32) રહે.લખધીરગઢ તા.ટકારા જી.મોરબીની ધરપકડ કરેલ છે અને પોલીસ પાસેથી મળતી માહિતી મુજબ દિગ્વિજય ઢેઢીનું જબલપુર રોડે કારખાનું આવેલ છે જે કારખાનું છેલ્લા ઘણા સમયથી બંધ છે અને તેના કારખાનામાં લૂંટના ગુનામાં સંડોવાયેલા આરોપીઓ પૈકીનાં ચારથી પાંચ શખ્સો રોકાયેલ હતા.અને તેણે રેકી કરી હોવાની શક્યતા છે.જેથી પોલીસે આ આરોપીના રિમાન્ડ લેવા માટે ચક્રોગતિમાન કરેલ છે.