મોરબીની સબ જેલમાં મોબાઈલ સહિત પ્રતિબંધિત વસ્તુ ઘુસાડવાના મામલે અજાણ્યા કેદી સહિત તપાસમાં ખુલે તેની સામે ગુનો નોંધાયો

મોરબીની સબજેલમાં મોબાઈલ ઘુસાડવા માટેનો પ્રયત્ન થયો હતો જો કે, જેલના સ્ટાફની સતર્કતાના કારણે આ પ્રયત્નો નિષ્ફળ થયો છે અને મોબાઈલ સહિતની વસ્તુઓને કબ્જે કરીને મોરબી એ ડિવિઝન પોલીસ સ્ટેશન ખાતે અજાણ્યા કેદી તેમજ તપાસમાં ખુલે તે શખ્સની સમયે ફરિયાદ નોંધાવવામાં આવતા પોલીસે ગુનો નોંધીને આરોપીઓને પકડવા માટે તજવીજ શરૂ કરેલ છે.

મોરબીની સબ જેલમાં પોણા મહિના પહેલા અમદાવાદથી જડતી સ્કવોર્ડના જેલર સહિતની ટિમ આવી હતી અને મોરબી સબ જેલની જડતી લેવામાં આવી હતી ત્યારે બેરેક નં. 3 અને 4 ની વચ્ચે જનરલ સંડાસ બાથરૂમમાં બેરેક નં. 4 બાજુથી 6 નંબરના બાથરૂમમાં પાણી જવાના બકોરામાં કાળા કલરનું ઝભલામાંથી બે કિપેડ વાળા સીમકાર્ડ વગરના મોબાઈલ ફોન મળી આવ્યા હતા. જેથી મોરબી એ ડિવિઝન પોલીસ સ્ટેશનમાં અજાણ્યા કેદી અને તપાસમાં ખુલે તેની સામે ગુનો નોંધવામાં આવેલ હતો. અને આ બનાવની તપાસ એ ડિવિઝન પોલીસ સ્ટેશનના પીએસઆઇ સી.એમ. કરકર કરી રહ્યા છે જો કે, આ બે મોબાઈલ કોના હતા ? કોના દ્વારા તેનો ઉપયોગ થતો હતો ? કયા કયા નંબરો ઉપર કોના દ્વારા ફોન કરવામાં આવ્યા છે ? આ સહિતની વિગતો હજુ બહાર આવી નથી ત્યાં વધુ એક વખત જેલમાં મોબાઈલ ઘુસાડવાનો પ્રયાસ કરવામાં આવ્યો હતો

શનિવારે સાંજે મોરબીની સબ જેલના જેલર એચ.એ.બાબરીયાએ પત્રકાર પરિષદ કરીને જણાવ્યુ હતુ કે, સબજેલની બહારના ભાગેથી એક પોટલાનો જેલની અંદર ઘા કરવામાં આવ્યો હતો ? જોકે જેલ સ્ટાફ દ્વારા સવારે જેલની બહારના ભાગમાં ચેક કરવામાં આવ્યું હતું ત્યારે સ્ટાફની સતર્કતાના કારણે તે પોટલું સગેવગે કરવામાં આવે તે પહેલા જ તેને જેલના સ્ટાફ દ્વારા કબજે કરી લેવામાં આવ્યું હતું અને પોટલાને ચેક કરવામાં આવતા તેમાંથી લાવા કંપનીનો એક મોબાઈલ ફોન, 4 માવા, બીડીની એક જુડી અને એક ચૂનાની ટોટી મળી આવેલ છે. જે બનાવ સંદર્ભે હાલમાં એ ડિવિઝનમાં હાલમાં જેમના સ્ટાફ રાજુભાઈ એન. જેજરીયાએ અજાણ્યા કેદી તથા તપાસમાં જેના નામ ખુલે તેની સામે ફરિયાદ નોંધાવતા પોલીસે ગુનો નોંધીને આરોપીને પકડવા માટેની તજવીજ શરૂ કરી છે અને આ અંગેની આગળની વધુ તપાસ પીએસઆઇ એન.આર.વાણીયા ચલાવી રહ્યા છે


ઉલ્લેખનીય છે કે, પોટલાની આડમાં મોબાઈલ ફોન મોરબીની સબજેલની અંદર ઘુસાડવા માટેનો પ્રયત્ન કરવામાં આવ્યો હતો. પરંતુ જેલ સ્ટાફના સતર્કતાના કારણે આ પ્રયત્નને નિષ્ફળ કરવામાં આવ્યો છે. જોકે, મોરબી સબજેલમાંથી અગાઉ મળી આવેલા બે મોબાઈલ ફોન અને હાલમાં જેલની અંદર ફેકવામાં આવેલ પોટલામાંથી મળી આવેલ મોબાઈલ ફોનની તપાસ મોરબી એ ડિવિઝન પોલીસ સ્ટેશનના જુદા જુદા બે અધિકારી દ્વારા કરવામાં આવી રહી છે જોકે આરોપીઓ પકડાશે કે કેમ અને ક્યારે પકડાશે તે તો આગામી સમય બતાવશે.