મોરબીના ઝીકિયારી ગામ નજીક ટ્રક ચાલકે ડબલ સવારી બાઈકને હડફેટે લેતા ઇજા પામેલા બે યુવાન સારવારમાં

મોરબીના ઝીકિયારી ગામ નજીક ડેમની ગોળાઈ પાસેથી ડબલ સવારી બાઈકને ટ્રક ચાલકે હડફેટે લેતા અકસ્માત થયો હતો જે બનાવમાં બાઇક ઉપર જઇ રહેલા બે યુવાનોને ઈજા થઈ હોવાથી બંનેને સારવાર માટે હોસ્પિટલે લઈ જવામાં આવ્યા હતા અને સારવાર લીધા બાદ ઇજા પામેલ યુવાને નોંધાવેલ ફરિયાદ આધારે પોલીસે ટ્રક ચાલક સામે ફરિયાદ નોંધવાતા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

પડધરી તાલુકાના બોડી ઘોડી ગામે રહેતા દેવશીભાઈ તેજાભાઈ ભરવાડ (29)એ ટ્રક નંબર જીજે 14 ઝેડ 7828 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યું છે કે મોરબી તાલુકાના ઝીકિયારી ગામ પાસે ડેમની ગોળાઈ નજીકથી ફરિયાદીનું બાઈક નંબર જીજે 3 પીએફ 7586 લઈને પસાર થઈ રહ્યા હતા ત્યારે બાઈક વાછાભાઈ ચલાવી રહ્યા હતા અને ટ્રક ચાલકે તેઓને ડબલ સવારી બાઈકને હડફેટ લેતા અકસ્માતનો બનાવ બન્યો હતો અને આ બનાવમાં ફરિયાદીને જમણા ગાલ, આંખ અને ડાબા જડબામાં અને શરીરે નાના મોટી ઈજાઓ થઈ હતી જ્યારે બાઈક ચલાવી રહેલા વાછાભાઈને માથા, મોઢા, છાતી તથા જમણા પગમાં ગંભીર ઇજા થઈ હતી જેથી તેને સારવાર માટે લઈ ગયા હતા અને બંને ઇજાગ્રસ્તોએ સારવાર લીધા બાદ હાલમાં યુવાને નોંધાવેલ ફરિયાદ આધારે પોલીસે ટ્રક ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

ફિનાઇલ પી લેતા સારવારમાં

મોરબીના રવાપર રોડ ઉપર રહેતા ભાવિક દીપકભાઈ મહેશ્વરી (25) નામના યુવાને કોઈ કારણોસર મોરબીના રેલવે સ્ટેશન રોડ ઉપર ફીનાઈલ પી લીધું હતું જેથી તેને સારવાર માટે હોસ્પિટલે લઈને આવ્યા હતા અને ત્યારબાદ આ બનાવની મોરબી એ ડિવિઝન પોલીસ સ્ટેશન ખાતે જાણ કરવામાં આવી હતી