વાંકાનેર બાઉન્ડ્રી પાસે સ્કોર્પિયોના ચાલકે ઉડાવતા રોડ ક્રોસ કરીને ચા પીવા જતાં ટ્રક ડ્રાઈવરને ગંભીર ઇજા

ધોરાજીના આધેડ ટ્રકમાં માલ ભરીને દહેજ તરફ જઈ રહ્યા હતા ત્યારે વાંકાનેર બાઉન્ડ્રી પાસે ટ્રક ઊભો રાખીને રોડ ક્રોસ કરીને ચા પીવા માટે જતા હતા ત્યારે ચોટીલા તરફથી આવતી સ્કોર્પિયો ગાડીના ચાલકે તેઓને હડફેટે લેતા અકસ્માત થયો હતો જે બનાવમાં આધેડને માથા, ડાબા ખભા, પાંસળી, પેટ અને કમરના ભાગે ગંભીર ઇજા થઈ હતી જેથી તેઓને સારવાર માટે હોસ્પિટલે લઈ ગયા હતા અને હાલમાં ઇજાગ્રસ્ત આધેડના પત્નીએ નોંધાવેલ ફરિયાદ આધારે પોલીસે અજાણી સ્કોર્પિયો ગાડીને ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

ધોરાજી ખાતે રહેતા જોસનાબેન દિનેશભાઈ કલોલા (54)એ વાંકાનેર તાલુકા પોલીસ સ્ટેશન ખાતે અજાણી સ્કોર્પિયો ગાડીના ચાલક સામે ફરિયાદ નોંધાવેલ છે જેમાં તેને જણાવ્યુ છે કે, તેઓના પતિ દિનેશભાઈ ઓધવજીભાઈ કલોલા પોતાના હવાલા વાળો ટ્રક નંબર જીજે 12 વાય 9395 લઇને બાયોકોલ ભરીને ધોરાજીથી દહેજ ગામ તરફ જવા માટે નીકળ્યા હતા ત્યારે ગત તા. 29/3 ના રાત્રીના પોણા બે વાગ્યાના અરસામાં વાંકાનેર બાઉન્ડ્રી નજીક આવેલ બિસ્મિલ્લા હોટલ સામે તેઓ  પોતાનો ટ્રક રોડ સાઈડમાં ઉભો રાખીને રોડની સામેની સાઈડમાં આવેલ ચા ની હોટલે તેઓ ચા પીવા માટે થઈને રોડ ક્રોસ કરીને જઈ રહ્યા હતા દરમિયાન ચોટીલા તરફથી આવતી અજાણી સ્કોર્પિયો ગાડીના ચાલકે તેઓને હડફેટે લીધા હતા જેથી ફરિયાદીના પતિને માથા, ડાબા ખભા, પાંસળી, પેટ અને ડાબી બાજુ કમરમાં ગંભીર ઇજાઓ થઈ હતી જેથી તેને સારવાર માટે હોસ્પિટલે લઈ ગયા હતા અને ત્યાર બાદ આ બનાવ સંદર્ભે હાલમાં ભોગ બનેલા આધેડના પત્નીએ નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે