મોરબીમાં ગ્રીનચોક પાસે આવેલ કંસારા શેરીમાં રહેતા સંજયભાઈ સગુણભાઈ કાગડા (42) એ મોરબી એ ડિવિઝન પોલીસ સ્ટેશન ખાતે મહાવીરસિંહ જીતેન્દ્રસિંહ સોલંકી ગુર્જર રહે.લક્કી પાર્ક શેરી નં.1 સોમનાથ સોસાયટી રૈયા ટેલીફોન એક્સચેન્જની પાસે રાજકોટ સામે ફરિયાદ નોંધાવી જણાવ્યુ હતુ કે મોરબીની મેઇન બજારમાં ગિરિરાજ વાસણ ભંડાર નામની દુકાન પાસે આરોપીએ ઇંસ્ટંટ લોન કરાવી આપવાનું કહીને ફરિયાદીનો મોબાઇલ ફોન મેળવી લીધો હતો.બાદ આરોપીએ તેમાંથી ફરિયાદીના આધારકાર્ડ, પાનકાર્ડ અને એટીએમ કાર્ડના નંબર ફરિયાદીની જાણ બહાર મેળવી લીધા હતા અને તેના આધારે આરોપીએ 62,000 તથા 11,000 ની જુદી-જુદી બે લોન લીધી હતી.જે પૈકી 11,000 ની લોન આરોપીએ ભરી દીધી હતી.તે ઉપરાંત સાહેદ આસનદાસ જીવાભાઈ રબારીના નામે 40,000 તથા 26,500 ની જુદી-જુદી બે લોન આ ઇસમે લીધી હતી.આમ આરોપીએ અલગ અલગ બે વ્યક્તિના નામની ચાર લોન લીધી હતી.તે પૈકીની એક લોનના રૂપિયા ભરી દીધા હતા.જો કે, ત્રણ લોનના રૂપિયા ભરેલ નથી અને ફરિયાદી તથા સાહેદ સાથે છેતરપિંડી કરી હોવાની નોંધાવાયેલ ફરિયાદ આધારે એ ડિનિઝન પોલીસે તપાસ કરતા આ ઇસમ રીઢો ગુનેગાર હોય તેની સામે સાઇબર ક્રાઇમ સહિત જુદા-જુદા પોલીસ સ્ટેશનમાં 11 જેટલા ગુના નોંધાયેલ છે.! હાલ રાજકોટ જેલ ખાતેથી મોરબી પોલીસે ઉપરોક્ત ગુનાના આરોપી મહાવીરસિંહ જીતેન્દ્રસિંહ સોલંકી ગુર્જર (૩૨) ધંધો લોન એજન્ટ રહે.લક્કી પાર્ક શેરી નંબર-૧ સોમનાથ સોસાયટી રાજકોટ ની ધરપકડ કરી હતી.અને તેને કોર્ટમાં રજૂ કરતા કોર્ટે તેને જેલ હવાલે કરવાનો હુકમ કરતા તેને જેલ હવાલે કરાયો હતો.