વાંકાનેરના જાલીડા ગામ નજીક ડબલ સવારી બાઇકને ઇકોના ચાલકે હડફેટે લેતા દંપતીને ગંભીર ઇજા થતાં સારવારમાં

વાંકાનેરના જાલીડા ગામના પાટીયા પાસે આવેલ હોટલ નજીકથી ડબલ સવારી બાઇક પસાર થઈ રહ્યું હતું ત્યારે ઇકો ગાડીના ચાલક બાઈકને હડફેટે લેતા અકસ્માત થયો હતો અને આ બનાવમાં બાઈક ઉપર જઈ રહેલ દંપતીને ઇજા થઈ હતી જેથી બંને ઇજાગ્રસ્તોને સારવાર માટે હોસ્પિટલે લઈને આવ્યા હતા અને આ બનાવ સંદર્ભે ઈજા પામેલ યુવાનના ભાઈએ નોંધાવેલ ફરિયાદ આધારે પોલીસે હાલમાં ઇકો ગાડીના ચાલક સામે ગુનો નોંધી આરોપીને પકડવા માટે તજવીજ શરૂ કરેલ છે

ટંકારાના ટોળ ગામે રહેતા ફૈજુરઅલીભાઇ મામદભાઇ ગઢવાળા (42)એ ઇકો ગાડી નં. જીજે 3 એલ 1075 ના ચાલક સામે ફરિયાદ નોંધાવેલ છે જેમાં જણાવ્યુ છે કે, વાંકાનેરના જાલીડા ગામના પાટીયા પાસે  દ્વારકાધીશ હોટલ સામેથી તેઓના મોટાભાઈ નિઝામુદ્દીન તથા ભાભી નસીમબેન બંને નિઝામુદ્દીન ભાઈના બાઈક નંબર જીજે 36 ક્યૂ 2981માં ભલગામ પ્રસંગમાં જવા માટે નીકળ્યા હતા અને પસાર થઈ રહ્યા હતા ત્યારે ઇકો ગાડીના ચાલકે તેઓના ડબલ સવારી બાઇકને હડફેટે લેતા અકસ્માત થયો હતો જે બનાવમાં ફરિયાદીના ભાઈને ડાબા પગના પંજામાં ફ્રેક્ચર, કપાળ અને ગુદાના ભાગે ઇજા થઈ હતી અને તેના ભાભી નસીમબેનને પગમાં તથા પેટની ડાબી બાજુએ ઇજા થઈ હોવાથી બંને ઇજાગ્રસ્તોને સારવાર માટે હોસ્પિટલે ખસેડવામાં આવ્યા હતા અને હાલમાં યુવાને નોંધાવેલ ફરિયાદ આધારે પોલીસે ઇકોના ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

ભેરડા ગામે માવતરે રહેતી મહિલાએ પતિ સામે કરી ફરિયાદ

મોરબીના જાંબુડીયા ગામ પાસે આવેલ ધર્મસિદ્ધિ સોસાયટીના મૂળ રહેવાસી અને હાલમાં ભેરડા ગામે માવતરના ઘરે રહેતા ઈલાબેન કિશોરભાઈ વઘોરા (32)એ તેના પતિ ઈશ્વરભાઈ રામજીભાઈ વઘોરા રહે. ધર્મ સિદ્ધિ સોસાયટી જાંબુડીયા વાળાની સામે વાંકાનેર તાલુકા પોલીસ સ્ટેશન ખાતે ફરિયાદ નોંધાવી છે જેમાં તેમણે જણાવ્યું છે કે, તેઓના પતિએ ભેરડા ગામે ફરિયાદીના માવતરના ઘરે આવીને બાળકો રાખવા બાબતે બોલાચાની ઝઘડો કરીને પેટના ભાગે માર મારી ગાળો આપી હતી અને જાનથી મારી નાખવાની ધમકી આપી હતી જેથી ભોગ બનેલ મહિલા દ્વારા  નોંધાવવામાં આવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.