મોરબીમાં યુવાનના પ્લોટ ઉપર દબાણ કરનારા પિતા-પુત્રની લેન્ડ ગ્રેબિંગના ગુનામાં ધરપકડ

મોરબી શહેરના વીસીપરામાં આવેલ રોહીદાસપરામાં યુવાનને સરકાર દ્વારા જે પ્લોટની ફાળવણી કરવામાં આવી હતી તે પ્લોટ ઉપર બે શખ્સો દ્વારા દબાણ કરી લેવામાં આવ્યું હતું જેથી કરીને ભોગ બનેલા યુવાન દ્વારા લેન્ડ ગ્રેબિંગની ફરિયાદ નોંધાવવામાં આવી હતી જેના આધારે પોલીસે ગુનો નોંધીને હાલમાં બંને આરોપીઓની ધરપકડ કરી આગળની રાબેતા મુજબની કાર્યવાહી હાથ ધરી છે

જાણવા મળતી વિગત પ્રમાણે મોરબીના વીસીપરા વિસ્તારમાં આવેલ રોહીદાસપરામાં રહેતા અને રીક્ષા ડ્રાઇવિંગનું કામ કરતા દિનેશભાઈ અરજણભાઈ સોલંકી (૪૦)એ મોરબી બી ડિવિઝન પોલીસ સ્ટેશન ખાતે ઓસમાણ ઉર્ફે હુસેનભાઇ સુલેમાનભાઈ સેડાત જાતે મિયાણા (૬૫) અને ઇબ્રાહીમ ઉર્ફે ઈભુ ઓસમાણભાઈ સેડાત જાતે મિયાણા (૩૦) રહે. બંને રોહીદાસપરા મોરબી વાળાની સામે લેન્ડ ગ્રેબિંગની ફરિયાદ નોંધાવી હતી જેમાં તેને જણાવ્યું હતું કે સરકાર દ્વારા તા ૨૫/૫/૨૦૧૮ ના રોજ હુકમ કરીને રોહીદાસપરામા આવેલ પ્લોટ નંબર-૧ ની ૧૨૭.૬૧ ચોરસ મીટર જમીન તેને ફાળવવામાં આવી હતી અને આ પ્લોટ ઉપર આરોપીઓ દ્વારા ગેરકાયદેસર કબજો કરી લેવામાં આવેલ છે અને પ્લોટ પચાવી પાડવામાં આવેલ છે અને પ્લોટ ખાલી નહીં કરી કબજો ચાલુ રાખેલ છે જેથી યુવાને નોંધાવેલ ફરિયાદ આધારે પોલીસે લેન્ડ ગ્રેબિંગનો ગુનો નોંધીને હાલમાં બંને આરોપીઓની ધરપકડ કરી આગળની રાબેતા મુજબની કાર્યવાહી હાથ ધરી છે