મોરબીના ઉંચી માંડલ નજીક ટ્રક ચાલકે હડફેટે લેતા સગીર સહિત બેનાં મોત: એકને ઇજા

મોરબીના ઉંચી માંડલથી તળાવિયા શનાળા જવાના રસ્તે રસ્તો ઓળંગી રહેલા ત્રણ યુવાનોને ટ્રક ચાલકે હડફેટે લેતા એક સગીર સહિત બે વ્યક્તિને ઘટના સ્થળે જ મોત નીપજ્યું હતું અને એક ઇજાગ્રસ્તને સારવારમાં ખસેડવામાં આવેલ છે

જાણવા મળતી વિગતો મુજબ મોરબી તાલુકાના ઉંચી માંડલ ગામે રહેતા સુનિલ લાખાભાઈ પરસાડીયા (૧૯), નયન રાજેશભાઈ લાંબરીયા (૧૪) અને કરણ ભરતભાઈ લાંબરીયા (૧૫) બાઇક લઈને જતાં હતા ત્યારે બાઈકમાં પંચર પડતા પંચર રીપેર કરાવી ત્રણેય રસ્તો ઓળંગી રહ્યા હતા ત્યારે ટ્રક જીજે ૧૨ એયુ ૮૪૨૭ ના ચાલકે તેને હડફેટે લીધા હતા ત્યારે સુનિલ લાખાભાઈ પરસાડીયા (૧૯) અને નયન રાજેશભાઈ લાંબરીયા (૧૪) નું મોત નીપજ્યું હતું. જો કે, કરણ ભરતભાઈ લાંબરીયાને ઈજા થઈ હોવાથી તેને મોરબી સિવિલ હોસ્પિટલે સારવાર માટે લઈને આવ્યા હતા અત્રે ઉલ્લખનીય છે કે, મૃતક બન્ને મિત્ર હતા અને સગીર સહિત બે વ્યક્તિના મોત નિપજ્યાં છે જેથી કરીને તેના પરિવારમાં શોકનું મોજું ફરી વળ્યું છે અને મૃતકના પરિવારજનમાંથી ફરિયાદ લેવા માટેની તજવીજ ચાલી રહી છે અને આ બનાવની પ્રાથમિક તપાસ બીટ જમાદાર જે.પી. પટેલ દ્વારા કરવામાં આવી છે