વાંકાનેર નજીક હાઇવે ઉપર યુવાનને કચડી નાખનારા ટ્રક ચાલક સામે નોંધાયો ગુનો

વાંકાનેરના ચંદ્રપુર પાસે નૂર પ્લાઝા કોમ્પ્લેક્સની સામે નેશનલ હાઈવે રોડ ઉપરથી સાયકલ લઈને યુવાન પસાર થઈ રહ્યો હતો ત્યારે તેને ટ્રકના ચાલકે તેની સાઇકલને હડફેટે લેતા અકસ્માત થયો હતો અને તે બનાવમાં યુવાનનું મોત નીપજયું હતું જેથી આ બનાવમાં મૃતક યુવાનના ભાઈએ નોંધાવેલ ફરિયાદ આધારે પોલીસે સ્થળ ઉપર વાહન મૂકીને પોલીસ સ્ટેશનને પહોંચી ગયેલા ટ્રક ચાલકની સામે ગુનો નોંધીને આગળની કાર્યવાહી હાથ ધરી છે.

બનાવી જાણવા મળતી માહિતી મુજબ વાંકાનેર તાલુકાના કેરાળા ગામે રહેતા ગુલામરસુલ સુલેમાનભાઈ રતનિયા (34)એ હાલમાં વાંકાનેર સિટી પોલીસ સ્ટેશન ખાતે ટ્રક નંબર આરજે 4 જીસી 3272 ના ચાલક સામે ફરિયાદ નોંધાવેલ છે જેમાં તેને જણાવ્યુ છે કે, વાંકાનેરના ચંદ્રપુર નજીક નૂર પ્લાઝા કોમ્પલેક્ષ સામે નેશનલ હાઇવે રોડ ઉપરથી તેનો ભાઈ અકબરભાઈ સલેમાનભાઈ રતનિયા (25) સાયકલ ચલાવીને વાંકાનેરથી કેરાળા ઘરે જઈ રહ્યો હતો ત્યારે ટ્રક ચાલકે પૂર ઝડપે તેનું વાહન ચલાવીને ફરિયાદીના ભાઈની સાયકલને લીધી હતી અને ટ્રકનો પાછળનો જોટો ફરિયાદીના ભાઈના શરીર ઉપરથી ફરી વળતા તેને ગંભીર ઇજા થઈ હોવાથી તેનું ઘટના સ્થળે મોત નીપજયું હતું. ત્યારે ટ્રક ચાલક પોતાનું વાહન સ્થળ ઉપર છોડીને વાંકાનેર સિટી પોલીસ સ્ટેશન ખાતે જાણ કરવા માટે ગયો હતો અને આ બનાવ સંદર્ભે હાલમાં મૃતક યુવાનના ભાઈએ નોંધાવેલ ફરિયાદ આધારે પોલીસે ટ્રક ચાલક સામે ગુનો નોંધીને આગળની રાબેતા મુજબની કાર્યવાહી હાથ ધરી છે.

અકસ્માત બનાવવામાં ધરપકડ