વાંકાનેરમાં ગાડીના પૈસાની લેતી દેતી બાબતે પાંચ શખ્સોએ છરી, પાઇપ અને ધોકા વડે યુવાન ઉપર કર્યો હુમલો

વાંકાનેરની ભાટિયા સોસાયટીમાં રહેતા યુવાનને ગાડીના પૈસાની લેતી દેતી બાબતે મનદુખ હતુ જે બાબતનો ખાર રાખીને તેના ઉપર પાંચ શખ્સોએ છરી, લોખંડનો પાઇપ અને ધોકા વડે હુમલો કર્યો હતો અને યુવાનને હાથે, પગે, કપાળે અને માથા ઉપર માર મારીને ઇજાઓ કરી હતી અને ગાળો આપીને ધ્યાનથી મારી રાખવાની ધમકી આપી હતી જેથી ભોગ બનેલ યુવાનને સારવાર લીધા બાદ હાલમાં નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે.

જાણવા મળતી માહિતી પ્રમાણે વાંકાનેરની ભાટિયા સોસાયટીમાં રહેતા હરપાલસિંહ કિશોરસિંહ ઝાલા (25)એ હાલમાં વાંકાનેર સિટી પોલીસ સ્ટેશન ખાતે સંજયભાઈ રાણાભાઇ રાજગોર, અંકુર ઉર્ફે ભાણું, લાલો ઉર્ફે શિવાજી રાજગોર, કેવલ મોહનભાઈ રાજગોર અને અનિલ રાજગોર રહે. બધા ભાટિયા સોસાયટી વાળા સામે ફરિયાદ નોંધાવેલ છે જેમાં જણાવ્યુ છે કે, ભાટિયા સોસાયટીમાં આવેલ ઉમિયા પાન સામે ફરિયાદી હતો ત્યારે ફરિયાદીને આરોપી સંજયભાઈ રાજગોર સાથે ગાડીના પૈસાની લેતી દેતી બાબતે મનદુખ હતું જે બાબતનો ખાર રાખીને સંજયભાઈ રાજગોર દ્વારા લોખંડના પાઇપ વડે ફરિયાદી યુવાનને માથામાં તથા ડાબા હાથની આંગળીમાં માર મારીને ફેકચર જેવી ઇજાઓ કરવામાં આવી હતી અને અંકુર ઉર્ફે ભાણું એ છરી વડે હુમલો કરીને ફરિયાદી યુવાનને કપાળના ભાગે ઇજા કરી હતી જયારે બાકીના ત્રણ આરોપીઓએ લાકડાના ધોકા વડે ફરિયાદી યુવાનને હાથે, પગે અને શરીર ઉપર માર માર્યો હતો અને ગાળો આપીને જાનથી મારી નાખવાની ધમકી આપેલ છે જેથી ભોગ બનેલ યુવાન દ્વારા સારવાર લેવા આવ્યા બાદ વાંકાનેર સિટી પોલીસ સ્ટેશન ખાતે ફરિયાદ નોંધાવવામાં આવતા પોલીસે પાંચ શખ્સની સામે ગુનો નોંધીને આરોપીઓને પકડવા માટે તજવીજ શરૂ કરી છે અને આ અંગેની આગળની વધુ તપાસ પી.એસ.આઇ. વી.કે. મહેશ્વરી ચલાવી રહ્યા છે