વાંકાનેરના સબ સ્ટેશનમાંથી રીયકટરની ચોરીના ગુનામાં મોરબી તાલુકા પોલીસે 3 આરોપીને દબોચી લીધા

વાંકાનેરના ધમલપર ગામ પાસે આવેલ 220 કેવી સબ સ્ટેશનની ખુલ્લી જગ્યામાંથી કેપેસીટર બેન્કના એક રિયક્ટરની ચોરી કરવામાં આવેલ હતી જે ગુનામાં નાસતા ફરતા આરોપી મોરબી તાલુકા વિસ્તારમાં હોવાની હક્કિત મળી હતી જેના આધારે મોરબી તાલુકા પોલીસે પોણા બે વર્ષથી નાસતા ફરતા ત્રણ આરોપીઓને ધરમપુર રોડ પરથી ઝડપી લીધેલ છે અને આગળની કાર્યવાહી માટે વાંકાનેર સિટી પોલીસ સ્ટેશન ખાતે જાણ કરવામાં આવેલ છે.

રાજકોટના મોરબી રોડ ઉપર આવેલ પુષ્કરધામ એવન્યુ-2 નાગબાઈ મંદિર પાસે રહેતા નિકુંજભાઈ ભવનભાઈ રામાણી (36)એ એપ્રિલ 2025 ના રોજ અજાણ્યા શખ્સની સામે વાંકાનેર સિટી પોલીસ સ્ટેશન ખાતે ચોરીની ફરિયાદ કરી હતી જેમાં જણાવ્યુ હતું કે, ધમલપર ગામ પાસે 220 કેવી વાંકાનેર સબ સ્ટેશનની ખુલ્લી જગ્યામાંથી કોઈ અજાણ્યા શખ્સ દ્વારા કેપેસીટર બેંકના એક રિયક્ટરની ચોરી કરવામાં આવેલ છે જેનું વજન 300 કિલો અને કિંમત 50,000 રૂપિયા થાય છે. આ ગુનામાં આરોપીને પકડવાના બાકી હતા તેવામાં મોરબી તાલુકા પોલીસની ટીમ પેટ્રોલીંગમાં હતી ત્યારે બાતમી મળી હતી કે, વાંકાનેર સબ સ્ટેશનમાંથી રીયકટરની ચોરીના ગુનામાં નાસતા ફરતા આરોપીઓ ધરમપુર રોડ પર સુરાપુરા દાદા મંદિર પાસે ઉભા છે જેથી મોરબી તાલુકા પોલીસની ટિમ ત્યાં પહોચી હતી અને આરોપી અરવિંદ બચુભાઈ વિરમગામીયા (33) રહે. વીસીપરા મદીના સોસાયટી મોરબી, વનરાજ દેવરાજ કુંઢીયા (20) રહે. લીલાપર ચોકડી મોરબી અને કાટીયો ઉર્ફે અશોક નરસીભાઈ વિરમગામીયા (35) રહે. કુળદેવી પાનની બાજુમાં માફાતિયાપરા મોરબી વાળાને ઝડપી લીધેલ છે અને આગળની કાર્યવાહી અર્થે વાંકાનેર સીટી પોલીસને જાણ કરવામાં આવેલ છે.