અપમૃત્યુના ત્રણ બનાવ: મોરબી, વાંકાનેર ટંકારા તાલુકામાં જુદાજુદા બનાવોમાં બે બાળકી અને એક યુવાનનું મોત
SHARE
JOIN OUR GROUP
અપમૃત્યુના ત્રણ બનાવ: મોરબી, વાંકાનેર ટંકારા તાલુકામાં જુદાજુદા બનાવોમાં બે બાળકી અને એક યુવાનનું મોત
મોરબીના બરવાળા ગામે માતા સાથે કપડાં ધોવા માટે ગયેલ બાળકી પાણીના ખાડામાં ડૂબી જતા તેનું મોત નીપજ્યું હતું જ્યારે વાંકાનેરના રાણેકપર ગામે વાડીમાં આવેલ કુવામાં પડી જતા પાણીમાં ડૂબી જવાથી તરુણીનું મોત નીપજ્યું છે અને ટંકારાના હરબટીયાળી ગામે વાડી વિસ્તારમાં ઝેરી જનાવર કરડી જવાથી યુવાનનું મોત નીપજ્યું હતું
મોરબીના બરવાળા ગામે રહેતા રાજુભાઈ દેલવાડીયાની 10 વર્ષની દીકરી તનુબેન દેલવાડીયા તેની માતા સાથે ગઈકાલે બપોરે ત્રણેક વાગ્યાના અરસામાં બરવાળા ગામ પાસે આવેલ પાણીના નાના ખાડા પાસે કપડાં ધોવા માટે ગઈ હતી ત્યારે ત્યાં પગ લપસી જવાના કારણે તનુબેન પાણીમાં ડૂબી ગઈ હતી જેથી કરીને તેને પાણીમાંથી બહાર કાઢીને તાત્કાલિક મોરબીની સરકારી હોસ્પિટલ ખાતે લઈને આવ્યા હતા અને ત્યાં ફરજ પરના ડોક્ટરે જોઈ તપાસીને બાળકીને મૃત જાહેર કરી હતી અને આ બનાવની મોરબી તાલુકા પોલીસ સ્ટેશન ખાતે જાણ કરવામાં આવી છે
મૂળ દાહોદ જિલ્લાના રહેવાસી અને હાલમાં વાંકાનેર તાલુકાના રાણેકપર ગામે યાકુબભાઈ માથકીયાની વાડીએ રહેતા અને મજૂરી કામ કરતા કનીયાભાઈ પસાયાની 15 વર્ષની દીકરી રેનાબેન વાડીએ આવેલ કુવામાં કોઈપણ કારણોસર પડી ગઈ હતી અને તે પાણીમાં ડૂબી ગઈ હતી જેથી તેને પાણીમાંથી બહાર કાઢીને તાત્કાલિક વાંકાનેરની સરકારી હોસ્પિટલ ખાતે લઈને આવ્યા હતા અને ત્યાં ફરજ પરના ડોક્ટરે તરુણીને મૃત જાહેર કરી હતી ત્યારબાદ આ બનાવની હોસ્પિટલ મારફતે વાંકાનેર સીટી પોલીસ સ્ટેશન ખાતે જાણ કરતા પોલીસે આગળની કાર્યવાહી હાથ કરી હતી
મૂળ દાહોદ જિલ્લાનો રહેવાસી અને હાલમાં ટંકારા તાલુકાના હરબટીયાળી ગામે વિમલભાઈ ધનજીભાઈની વાડીએ રહેતો અને મજૂરી કામ કરતો મુકેશભાઈ કુબાભાઈ વાખડા (22) નામનો યુવાન વાડીએ હતો ત્યારે ત્યાં તેને ઝેરી જનાવર કરડી ગયું હતું જેથી તેને તાત્કાલિક સારવાર માટે બેભાન હાલતમાં મોરબીની સરકારી હોસ્પિટલ સાથે લઈને આવ્યા હતા અને ત્યાં ફરજ પરના ડોક્ટરે તેને જોઈ તપાસીને મૃત જાહેર કર્યો હતો અને આ બનાવની શૈલેષભાઈ તેજાભાઈ વાખડા (38) રહે. હાલ રોહીશાળા ગામ મનોજભાઈ પટેલની વાડીએ મૂળ રહે દાહોદ જિલ્લા વાળાએ ટંકારા તાલુકા પોલીસ સ્ટેશન ખાતે જાણ કરતા પોલીસ આગળની કાર્યવાહી હાથ ધરી છે
