વાંકાનેરના લૂણસર નજીકથી યુવાનનું અપહરણ કરીને માર મારનારા ત્રણ શખ્સની ધરપકડ

વાંકાનેરના લુણસરથી મનડાસર જવાના રસ્તા ઉપર સ્વિફ્ટ  ગાડી લઈને જઈ રહેલા યુવાન સાથે રૂપિયાની લેતી જતી બાબતનું મનદુઃખ રાખીને સ્કોર્પિયો ગાડીમાં આવેલા ત્રણ શખ્સો દ્વારા કાર સાથે કાર અથડાવવામાં આવી હતી ત્યાર બાદ યુવાનનું અપહરણ કરવામાં આવ્યું હતું અને તે યુવાનને ધોકા વડે તેમજ સૂઇયા વડે શરીર ઉપર અલગ અલગ જગ્યાએ માર મારીને ઇજા કરી હતી અને જાનથી મારી નાખવાની ધમકી આપી હતી જેથી યુવાને સારવાર લીધા બાદ નોંધાવેલ ફરિયાદ આધારે પોલીસે ત્રણ શખ્સોની ધરપકડ કરીને આગળની કાર્યવાહી કરેલ છે.

થાન તાલુકાના મનડાસર ગામે રહેતા લીલાભાઈ કાળુભાઈ ભુંડિયા (35)એ વાંકાનેર તાલુકા પોલીસ સ્ટેશન ખાતે ખોડા રણછોડભાઈ સેફાત્રા અને ગોપાલ ઘેલાભાઈ સેફાત્રા રહે. બંને ખેતરડી તાલુકો હળવદ અને મેલા હમીરભાઇ સેફાત્રા રહે ચુંપણી તાલુકો હળવદ વાળા સામે ફરિયાદ નોંધાવેલ હતી કે, ખોડા સેફાત્રાએ પૈસાની લેતીદેતી બાબતે મનદુઃખ રાખીને સ્કોર્પિયો ગાડી નંબર જીજે 13 એનએન 1529 માં આવીને લુણસરથી મનડાસર ગામ તરફ જવાના રસ્તા ઉપર ફરિયાદીની સ્વીફ્ટ કાર નંબર જીજે 36 બી 8292 માં આરોપીઓએ તેની સ્કોર્પિયો ગાડી અથડાવી હતી જેથી કરીને ફરિયાદીની ગાડીમાં આગળના કાચ તથા બોનેટમાં નુકસાન થયું હતું.

ત્યાર બાદ ફરિયાદી યુવાનનું સ્કોર્પિયો ગાડીમાં આવેલા ત્રણેય શખ્સોએ અપહરણ કર્યું હતું અને તેને ધોકા વડે, ઢીકાપાટુનો અને સૂઇયા વડે શરીર ઉપર માર મારીને ઇજા કરી હતી અને બાકી નીકળતા પૈસા પાછા મેળવવા માટે થઈને યુવાનને ગાળો આપીને જાનથી મારી નાખવાની ધમકી આપવામાં આવી હતી જેથી ભોગ બનેલ યુવાને સારવાર લીધા બાદ વાંકાનેર તાલુકા પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધીને આરોપીઓને પકડવા માટે તજવીજ શરૂ કરી હતી. અને વાંકાનેર બાઉન્ટ્રી પાસેથી પોલીસે આરોપી ખોડા રણછોડભાઈ સેફાત્રા અને ગોપાલ ઘેલાભાઈ સેફાત્રા રહે. બંને ખેતરડી તાલુકો હળવદ અને મેલા હમીરભાઇ સેફાત્રા રહે ચુંપણી તાલુકો હળવદ વાળાની ધરપકડ કરી હતી અને અપ્રહુત યુવાનને મુક્ત કરાવેલ હતો.

અત્રે ઉલેખનીય છે કે, આરોપીઓ યુવાનનું અપહરણ કરીને લઈ ગયા હતા તે યુવાનનો મોબાઈલ ફોન મૂકીને ગયા હતા અને ત્રણેય આરોપીઓના મોબાઈલ ફોન બંધ હતા જો કે, વાંકાનેર અને હળવદ તાલુકા પોલીસે 20 કલાક સુધી જુદીજુદી દિશામાં તપાસ કરીને યુવાનને મુક્ત કરાવીને આરોપીઓની ધરપકડ કરીને આગળની કાર્યવાહી કરેલ છે.