મોરબીના સનાળા ગામ પાસે ડબલ સવારી બાઇક આડે રોજડું આવતા સર્જાયેલ અકસ્માતમાં એક યુવાનનું મોત

મોરબી રાજકોટ હાઇવે રોડ ઉપર આવેલ સનાળા ગામ પાસે મેડિકલ કોલેજ સામેથી ડબલ સવારી બાઇક પસાર થઈ રહ્યું હતું ત્યારે બાઈકની આડે અચાનક રોજડું આવ્યું હતું જેથી બાઇક સ્લીપ થઈ ગયું હતું અને બાઈક ચાલક સહિત બંને વ્યક્તિને ઇજા થયેલ હતી જેમાં બાઇક ચાલકને વધુ ઇજા થયેલ હોવાથી તેનું મોત નીપજયું હતું આ બનાવ સંદર્ભે હાલમાં મૃતક યુવાનના પિતાની ફરિયાદ લઈને પોલીસે રાબેતા મુજબની કાર્યવાહી કરેલ છે.

જાણવા મળતી માહિતી મુજબ ગીર સોમનાથ જિલ્લાના ગાભા ગામના રહેવાસી કરસનભાઈ દેવશીભાઈ વાઢેર (55) ની ફરિયાદ લઈને હાલમાં તેના મૃતક દીકરા જીતેન્દ્રભાઈ કરસનભાઈ વાઢેર (23) રહે. ગાભા ગામ તાલુકો તાલાળા વાળા સામે મોરબી એ ડિવિઝન પોલીસ સ્ટેશન ખાતે ગુનો નોંધીને આગળની કાર્યવાહી હાથ ધરી છે જેમાં ફરિયાદીએ જણાવ્યું છે કે, મોરબી રાજકોટ હાઇવે રોડ ઉપર આવેલ સનાળા ગામ પાસે નવી બની રહેલ મેડિકલ કોલેજ સામે રસ્તા ઉપર થી ફરિયાદીનો દીકરો તેનું બાઈક નંબર જીજે 32 એન 7141 લઈને પસાર થઈ રહ્યો હતો ત્યારે તેની સાથે બાઈકમાં ચિરાગભાઈ પણ બેઠેલ હતો અને બાઇક આડે રોજડુ ઉતરતા અકસ્માતે બાઈક સ્લીપ થઈ ગયું હતું જે બનાવમાં ચિરાગભાઈને માથાના ભાગે તથા શરીરે ઇજાઓ થઈ હતી જેથી તેને સારવારમાં લઈને આવ્યા હતા અને ફરિયાદીના દીકરા જીતેન્દ્રભાઈને માથામાં તથા બંને હાથમાં ગંભીર ઇજાઓ થયેલ હોવાથી તેનું મોત નીપજ્યું હતું જે બનાવ સંદર્ભે હાલમાં મૃતકના પિતાએ નોંધાવેલ ફરિયાદ આધારે પોલીસે ગુનો નોંધીને આગળની કાર્યવાહી હાથ ધરી છે.

મારામારીમાં ઇજા

મોરબીના લાતી પ્લોટ પાસે આવેલ જોસનગર વિસ્તારમાં રહેતા તોફીક ઈસ્માઈલભાઈ કલાડિયા (27) નામના યુવાનને કોઈ કારણોસર લાતી પ્લોટ શેરી નં- 7 પાસે મારામારીના બનાવમાં ઈજા થઈ હતી જેથી તેને સારવાર માટે મોરબીની સિવિલ હોસ્પિટલ ખાતે લાવ્યા હતા અને ત્યાં તેને સારવાર આપીને આ બનાવની મોરબી એ ડિવિઝન પોલીસને જાણ કરવામાં આવી હતી

બાળકી સારવારમાં

મોરબીમાં રહેતા મોહનભાઈ પરમારની દીકરી ભાવના (10) તેના પિતા સાથે બાઈકમાં પાછળના ભાગે બેસીને જઈ રહી હતી ત્યારે કોઈ કારણોસર તે બાઈકમાંથી નીચે પડી જતા તેને ડાબા હાથમાં ઇજા થઈ હતી જેથી તેને સારવાર માટે મોરબીની ખાનગી હોસ્પિટલમાં આવ્યા હતા અને ત્યાં તેને સારવાર આપ્યા બાદ આ બનાવની મોરબી એ ડિવિઝન પોલીસને જાણ કરવામાં આવી હતી.