હળવદના ચરાડવા ગામે પાસેથી રીક્ષામાં કતલખાને લઈ જવાતા બે પાડાને બચાવ્યા, મહિલા સહિત બે સામે ગુનો નોંધાયો

હળવદ તાલુકાના ચરાડવા ગામે બસ સ્ટેશન પાસેથી સીએનજી રીક્ષા પસાર થઈ રહી હતી જેમાં ઘાસચારો કે પાણીની વ્યવસ્થા વગર બે પાડાને દોરડાથી બાંધીને લઈ જવામાં આવતા હતા જેથી કરીને હાલમાં હળવદ તાલુકા પોલીસ સ્ટેશન ખાતે મહિલા સહિત કુલ બે વ્યક્તિઓની સામે ગુનો નોંધીને પોલીસે તેની ધરપકડ કરી આગળની કાર્યવાહી હાથ ધરી છે

જાણવા મળતી માહિતી મુજબ હળવદમાં આવેલ શિવ બંગલો સોસાયટી ખાતે રહેતા ભાવેશભાઈ ચંદુભાઈ ઠક્કર (47)એ હળવદ તાલુકા પોલીસ સ્ટેશન ખાતે જયેશભાઈ બચુભાઈ સલાટ (40) રહે. સુંદરગઢ રોડના કાંઠા ઉપર મૂળ રહે. કવાડિયા તાલુકો હળવદ અને હસીબેન રૂપાભાઈ સલાટ (40) રહે. કવાડિયા તાલુકો હળવદ વાળા સામે ફરિયાદ નોંધાવેલ છે જેમાં જણાવ્યું છે કે, હળવદ તાલુકાના ચરાડવા ગામે બસ સ્ટેશન પાસેથી સીએનજી રીક્ષા નંબર જીજે 36 ડબલ્યુ 7174 લઈને બંને આરોપીઓ જઈ રહ્યા હતા દરમિયાન રીક્ષાને ચેક કરતા તેમાં દોરડા વડે બે પાડાને બાંધીને લઈ જતા અને વાહનમાં ઘાસચારો કે પાણીની કોઈ સગવડ રાખવામાં આવી ન હતી જેથી હાલમાં યુવાને નોંધાવેલ ફરિયાદ આધારે પોલીસે ગુજરાત પશુ કુરતા અધિનિયમની જુદી જુદી કલમો હેઠળ ગુનો નોધીને આરોપીઓની ધરપકડ કરી આગળની રાબેતા મુજબની કાર્યવાહી હાથ ધરી છે.