ઇન્સ્ટગ્રામથી મોરબીમાં રહેતી સગીરાના સંપર્કમાં આવેલ શખ્સે આચર્યું દુષ્કર્મ: 3 સામે ફરિયાદ

સોશિયલ મીડિયાના માધ્યમથી સંપર્કમાં આવ્યા બાદ દુષ્કર્મની ઘટના બની હોય આવી ઘટનાઓ અગાઉ અનેક વખત સામે આવી ચૂકી છે તેવામાં વધુ એક વખત મોરબી શહેરી વિસ્તારમાં રહેતી સગીરા સાથે યુવાન સોશિયલ મીડિયાના માધ્યમથી સંપર્કમાં આવ્યો હતો અને ત્યારબાદ તે સગીરાને અલગ અલગ સ્થળે લઈ જઈને તેની સાથે દુષ્કર્મ આચરવામાં આવ્યું હતું તેમજ યેનકેન પ્રકારે સગીરા પાસેથી 17.50 લાખ જેટલી રકમ પડાવી લેવામાં આવી હતી જે બનાવ સંદર્ભે હાલમાં ભોગ બનેલ સગીરાએ ફરિયાદ નોંધવાતા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

વર્તમાન સમયમાં સોશિયલ મીડિયાનું જાણે કે યુવક યુવતીઓને ઘેલું લાગ્યું હોય તે પ્રકારે વિડિયો અને ફોટો ઉપર લાઇક અને વ્યુ મેળવવા માટે થઈને સોશ્યલ મીડિયાના જુદા જુદા પ્લેટફોર્મ ઉપર મૂકવામાં આવતા હોય છે તેવી જ રીતે મોરબીમાં રહેતી સગીરા દ્વારા ઇન્સ્ટગ્રામ ઉપર પોતાના વિડીયો ફોટો મુકવામાં આવ્યા હતા ત્યાર બાદ વિશ્વરાજસિંહ સરવૈયા નામના શખ્સ તે સગીરાના સંપર્કમાં આવ્યો હતો અને ત્યારબાદ સગીરાને અમદાવાદ, રાજકોટ, ભાવનગર વિગેરે જુદી જુદી જગ્યા ઉપર લઈ જઈને તે સગીરા સાથે દુષ્કર્મ આચરવામાં આવ્યું હતું. આટલું જ નહીં પરંતુ સગીરા પાસેથી યેનેકેન પ્રકારે 17.50 લાખ રૂપિયા જેવી રકમ પડાવી લેવામાં આવી હતી અને વિશ્વરાજસિંહ સરવૈયાના પરિવારજનો દ્વારા સગીરાને ધમકીઓ આપવામાં આવી હતી જેથી આ બનાવ સંદર્ભે હાલમાં સગીરાએ મોરબી એ ડિવિઝન પોલીસ સ્ટેશન ખાતે વિશ્વરાજસિંહ સરવૈયા તથા તેના પરિવારના બે સભ્યો આમ કુલ મળીને ત્રણ વ્યક્તિઓની સામે ફરિયાદ નોંધાવતાં પોલીસે પોકસો સહિતની કલમ હેઠળ ગુનો નોંધીને આરોપીઓને પકડવા માટે તજવીજ હાથ ધરી છે