મોરબીમાં ઘૂસી ગયેલા શખ્સને ફાર્મ હાઉસે લઈ જઈને માર મારીને હત્યા કરવાના ગુનામાં આરોપીના જામીન નામંજૂર

મોરબીમાં યુવાનના ઘરમાં એક શખ્સ ઘૂસી ગયો હતો જેને કારમાં ફાર્મ હાઉસ ખાતે લઈ ગયા હતા અને ત્યાં તેને માર મરવામાં આવેલ હતો જેથી યુવાનનું મોત નીપજયું હતું અને વાંકાનેર તાલુકા પોલીસ સ્ટેશન ખાતે ગુનો નોંધાયેલ હતો જે ગુનામાં છ આરોપીને પકડવામાં આવ્યા હતા જે આરોપીઓ પૈકી એક આરોપીએ કોર્ટમાં જામીન અરજી કરી હતી જેને મોરબીની કોર્ટે ફગાવી દીધી છે અને અરજીને નામંજૂર કરી છે.

વાંકાનેરના સમથેરવા ગામની સીમમાંથી તા. 8/4/26 ના રોજ નિર્વસ્ત્ર હાલતમાં અજાણ્યા પુરુષની લાશ મળી હતી જેથી વાંકાનેર તાલુકા પોલીસ સ્ટેશને તેની નોંધ કરીને તપાસ શરૂ કરી હતી અને યુવાનની હત્યા કરવામાં આવી હોવનું સામે આવ્યું હતું જેથી એલસીબીની ટીમે 6 શખ્સોની હત્યના ગુનામાં ધરપકડ કરી હતી અને આરોપીની પૂછપરછમાં સામે આવ્યું હતું કે, મૃતક અજાણ્યો પુરુષ આરોપી સંદીપ ધનજીભાઈ ઝાલરીયાના મોરબીમાં આવેલ ઘરે ઘૂસી ગયો હતો અને ચોરી કરવાના ઈરાદે આવ્યો હોય તેના ખિસ્સામાંથી આરોપીની કાર અને એકટીવાની ચાવીઓ મળી આવી હતી જેથી આ અજાણ્યા પુરુષને ઈનોવા કારમાં બેસાડીને માથક નજીક પોતાના સોલાર ફાર્મમાં લઇ ગયા હતા અને ત્યાં 6 શખ્સોએ પીવીસી પાઈપથી ઢોર માર માર્યો હતો અને બાદમાં આ યુવાનને કારમાં લઈ જઈને સમથેરવા ગામની સીમમાં નાખી આવ્યા હતા

જો કે, પોલીસે હત્યાના આ ગુનામાં આરોપી સંદીપ ધનજીભાઈ ઝાલરીયા, એલીસ જસમતભાઈ ઉર્ફે જયંતીભાઈ ઝાલરીયા, દિવ્યેશ ગોવિંદભાઈ ઝાલરીયા, મુન્નો ઉર્ફે વરુણ રૈયાભાઈ ગોલતર, રાજેશ રમેશ ડાભી અને રાજીવ ઉર્ફે રાજુ કામેશ્વરપ્રસાદ શ્રીવાસ્તવનની ધરપકડ કરી હતી અને તેઓની પાસેથી ઈનોવા કાર, 6 મોબાઈલ સહિત 11 લાખનો મુદમાલા કબ્જે કર્યો હતો. આ આરોપીઓ જેલમાં છે તેવામાં આરોપી દિવ્યેશ ગોવિંદભાઈ ઝાલરીયાએ વકીલ મારફત બીજા એડીશનલ સેસન્સ જજ મોરબીની કોર્ટમાં જામીન માટે અરજી કરી હતી જેનો મદદનીસ સરકારી વકીલ સંજયભાઇ દવેએ ધારદાર દલીલો કરીને વિરોધ કર્યો હતો અને બચાવ પક્ષે કરેલી દલીલોને કાઉન્ટર કરતા કહ્યું હતું કે, તપાસ પૂર્ણ થઇ ગઈ અને ચાર્જશીટ ફાઈલ થવાથી અરજદાર આપોઆપ જામીન મેળવવા હકદાર બનતા નથી સહિતની દલીલ કરી હતી જેને ધ્યાને લઈને કોર્ટે આરોપીની જામીન અરજી નામંજુર કરી છે