મોરબીના કેરાળા (હ) ગામે ઘરધણીને સૂતા રાખીને ઘરમાંથી રોકડ-દાગીના મળીને ૬.૩૦ લાખ ચોરી

મોરબીના કેરાળા (હરીપર) ગામે રહેતા યુવાનના ઘરને તસ્કરે નિશાન બનાવેલ છે અને તે યુવાન તેની પત્ની અને દીકરા સાથે ઘરના ફળિયામાં સૂતો હતો ત્યારે ઘરમાં બારીની ગ્રીલ તોડીને  અજાણ્યા શખ્સ દ્વારા ખેતીના પાકના વેચાણથી આવેલ રોકડા રૂપિયા ૩.૫૦ લાખ અને સોનાના દાગીના મળીને કુલ ૬.૩૦ લાખના મુદામાલની ચોરી કરેલ છે જેથી કરીને હાલમાં પોલીસે ભોગ બનેલા યુવાનની ફરિયાદ લઈને આરોપીને પકડવા માટે તજવીજ શરૂ કરેલ છે

બનાવની જાણવા મળતી માહિતી મુજબ મોરબીના કેરાળા (હરીપર) ગામે રહેતા દિલીપભાઇ કાનજીભાઇ કારાવડીયા જાતે પટેલ (૪૧)એ અજાણ્યા શખ્સની સામે ચોરીની ફરિયાદ નોંધાવી છે જેમાં તેને જણાવ્યુ છે કે, તા.૩૧/૫/૨૦૨૩ ના કલાક ૧૧ વાગ્યાથી લઈને તા.૧/૬/૨૦૨૩ ના સવારના ૫:૩૦ દરમ્યાન તે પોતાની પત્ની અને દીકરા સાથે ઘરે ફળિયામાં સૂતા હતા ત્યારે કોઇ અજાણ્યા શખ્સે તેના મકાનના હોલની બારીની ગ્રીલ તોડીને ઘરમાં પ્રવેશ કર્યો હતો અને તેના ઘરમાં મૂકેલ બેડ(સેટી) માં રાખેલ તેની ખેતીના પાકના વેચાણથી આવેલ રોકડા રકમ ૩,૫૦,૦૦૦ તેમજ સોના દાગીનાઓ જેમા સોનાની એક તોલાની એક જોડી બંગડી ૪૦,૦૦૦, દોઢ તોલાના એક જોડી સોનાના પાટલા ૬૦,૦૦૦, ત્રણ તોલાનો એક સોનાનો હાર ૧,૨૦,૦૦૦, લેડીઝને પહેરવાની સોનાની ૩ વીંટી ૬૦,૦૦૦ આમ કુલ મળીને ૬,૩૦,૦૦૦ ના મુદામાલની ચોરી કરવામાં આવેલ છે જેથી કરીને યુવાને નોંધાવેલ ફરિયાદ આધારે પોલીસે આઇપીસી કલમ ૪૫૭ અને ૩૮૦ મુજબ ગુનો નોંધીને આગળની કાર્યવાહી કરેલ છે