મોરબીના મહેન્દ્રનગર પાસે શિવ કોમ્પલેક્ષ નજીકથી દેશી બનાવટની પિસ્તોલ સાથે એક શખ્સ ઝડપાયો

મોરબી નજીકના મહેન્દ્રનગર ગામના પાટીયા પાસે આવેલ શિવ કોમ્પલેક્ષ સામેથી એક શખ્સ પસાર થઈ રહ્યો હતો ત્યારે તેને રોકીને પોલીસ દ્વારા ચેક કરવામાં આવ્યો હતો ત્યારે તેની પાસેથી દેશી હાથ બનાવટની એક પિસ્તોલ મળી આવી હતી જેથી કરીને પોલીસે તેની ધરપકડ કરી હતી અને તેની પાસેથી ૧૦૦૦૦ નું હથિયાર કબજે કરી મોરબી બી ડિવિઝન પોલીસ સ્ટેશન ખાતે આર્મ્સ એક્ટ મુજબ ગુનો નોંધીને આગળની કાર્યવાહી હાથ ધરી છે

બનાવની જાણવા મળતી માહિતી પ્રમાણે મોરબી જિલ્લા એસઓજીનો સ્ટાફ મોરબીના મહેન્દ્રનગર ગામના પાટીયા પાસે શિવ કોમ્પલેક્ષ પાસે હતો ત્યારે ત્યાંથી પસાર થઈ રહેલા એક શખ્સને રોકીને પોલીસે ચેક કરતા તેની પાસેથી દેશી બનાવટની એક પિસ્તોલ મળી આવી હતી જેથી પોલીસે ૧૦  હજાર રૂપિયાની કિંમતનું હથિયાર તેની પાસેથી કબજે કર્યું હતું અને કુલદીપસિંહ કિશોરસિંહ જાડેજા જાતે દરબાર (૩૮) રહે. વાધરવા તાલુકો માળીયા મીયાણા વાળાની ધરપકડ કરી હતી અને તેની સામે મોરબી સીટી બી ડિવિઝન પોલીસ સ્ટેશન ખાતે આર્મ્સ એક્ટની કલમ રપ(૧-બી), એ તથા જી.પી.એકટ કલમ ૧૩પ મુજબ ગુનો નોંધી આગળની કાર્યવાહી હાથ ધરી છે

ચાર બીયર

માળીયા મીયાણા તાલુકાના નાની બરારથી જાજાસર ગામ તરફ જવાના રસ્તા ઉપરથી પસાર થઈ રહેલા શખ્સને રોકીને સ્થાનિક પોલીસ દ્વારા ચેક કરવામાં આવ્યો હતો ત્યારે તેની પાસેથી બિયરના ચાર ટીન મળી આવ્યા હતા જેથી કરીને પોલીસે ૪૦૦ ની કિંમતમાં બિયરનો જથ્થો કબજે કર્યો હતો અને હમીરભાઈ સુખાભાઈ કોઠીવાર જાતે આહિર (૩૨) રહે નાની બરાર તાલુકો માળીયા મીયાણા વાળાની ધરપકડ કરેલ છે