મોરબીના સોખડા નજીક ડબલ સવારી બાઈકે કાર ચાલકે હડફેટે લેતા અકસ્માત: ઇજા પામેલા બે વ્યક્તિ સારવારમાં

મોરબી તાલુકાના સોખડા ગામના પાટીયાથી બાદરગઢ ગામના પાટીયા તરફ જવાના રસ્તા ઉપર આવેલ હોટલ પાસેથી ડબલ સવારી બાઈક પસાર થઈ રહ્યું હતું ત્યારે તે બાઈકને કાર ચાલકે હડફેટે લેતા અકસ્માત થયો હતો અને ત્યારે બાઈક પર જઈ રહેલા બંને વ્યક્તિઓને ઇજા થતાં તેને સારવાર માટે હોસ્પિટલમાં લઈને આવ્યા હતા અને સારવાર લીધા બાદ યુવાને મોરબી તાલુકા પોલીસ સ્ટેશન ખાતે કાર ચાલક સામે ફરિયાદ નોંધાવતા પોલીસે આગળની કાર્યવાહી હાથ ધરી છે.

જાણવા મળતી માહિતી મુજબ મૂળ હળવદ તાલુકાના રણમલપુર ગામના રહેવાસી અને હાલમાં મોરબી તાલુકાના સોખડા ગામે હકાભાઇ બાલાસરાની વાડીએ રહેતા અને નોકરી કરતા રવિભાઈ રાજેશભાઈ વિરાણી (19) નામના યુવાને કાર નંબર જીજે 3 એમપી 1545 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યુ છે કે, સોખડા ગામના પાટીયાથી બાદરગઢ ગામના પાટીયા તરફ જવાના રસ્તે આવતી શેરે પંજાબ હોટલ પહેલા રોડ ઉપરથી તેઓ બાઈક નંબર જીજે 3 એચએલ 6285 લઈને પસાર થઈ રહ્યા હતા ત્યારે તેના બાઈકમાં મનોજભાઈ જેરામભાઈ પાડલીયા પણ બેઠેલા હતા અને કાર ચાલકે તેઓના ડબલ સવારી બાઇકને હડફેટ લેતા ફરિયાદી રવિભાઈ તથા તેની સાથે બાઈકમાં બેઠેલા મનોજભાઈને હાથે પગે અને શરીરે ઇજાઓ થઈ હતી જેથી કરીને તેઓને સારવાર માટે હોસ્પિટલમાં લઈને આવ્યા હતા અને સારવાર લીધા બાદ ભોગ બનેલા યુવાને નોંધાવેલ ફરિયાદ આધારે પોલીસે હાલમાં કાર ચાલક સામે ગુનો નોંધી આરોપીને પકડવા માટે તજવીજ શરૂ કરેલ છે અને આ અંગેની આગળની વધુ તપાસ મોરબી તાલુકા પોલીસ સ્ટેશનના એન.જે. ખડીયા ચલાવી રહ્યા છે.