મોરબીના બાયપાસ રોડે મહાપાલિકાની ટીમે 50 જેટલા દબાણો જીસીબીથી તોડી પાડ્યા

મોરબી મહાનગરપાલિકા દ્વારા અઠવાડિયામાં એક દિવસ કોઈ એક વિસ્તારની અંદર મુખ્યમાર્ગની આસપાસના દબાણને દૂર કરવા માટેની કામગીરી કરવામાં આવે છે જેના ભાગરૂપે મોરબીના બાયપાસ રોડ ઉપર દલવાડી સર્કલથી પંચાસર ચોકડી વચ્ચેના વિસ્તારમાં ડિમોલેશન હાથ ધરવામાં આવ્યું હતું અને અંદાજે 50 જેટલા નાના મોટા, કાચા પાકા દબાણોને જેસીબીથી તોડી પાડવામાં આવ્યા હતા.

મોરબી મહાપાલિકા અસ્તિત્વમાં આવી ત્યારથી મોરબીના જુદા જુદા વિસ્તારમાં મુખ્યમાર્ગોની આસપાસમાં જે નાના મોટા, કાચા પાકા દબાણો કરવામાં આવ્યા છે તેને તોડી પાડવા માટેની કામગીરી કમિશનર સ્વપ્નિલ ખરેની સૂચના મુજબ કરવામાં આવી રહી છે જેના ભાગરૂપે દર બુધવારે કોઈ એક વિસ્તારની અંદર ડિમોલિશન હાથ ધરવામાં આવતું હોય છે તેવી જ રીતે મોરબીના કંડલા બાયપાસ રોડ ઉપર આવેલ દલવાડી સર્કલથી લઈને પંચાસર ચોકડી સુધીના વિસ્તારમાં રસ્તાની બંને બાજુએ કરવામાં આવેલ નાના મોટા, કાચા પાકા દબાણોને દૂર કરવા માટેની કામગીરી મહાપાલિકાની ટીમ દ્વારા શરૂ કરવામાં આવી હતી અને અધિકારીને કહેવા મુજબ આ કામગીરી દરમિયાન દુકાનો, હોટલ અને ભંગારના ડેલા વગેરે જેવા દબાણો મળીને કુલ 50 જેટલા દબાણોને દૂર કરવામાં આવ્યા છે અને વધુમાં મહાપાલિકાના કમિશનર સ્વપ્નિલ ખરે એ જણાવ્યું હતું કે મોરબીના મુખ્યમાર્ગો ઉપર કોઈ પણ જગ્યાએ નાના મોટા, કાચા પાકા કોઈપણ પ્રકારના દબાણો નડતરરૂપ હશે તો તેને તોડી પાડવા માટેની કામગીરી આવી જ રીતે ચાલુ રાખવામાં આવશે.