માળીયા (મી)ના તરઘરી ગામના સરપંચ સાગર ફૂલતરિયાને જિલ્લા વિકાસ અધિકારીએ ફટકારી કારણદર્શક નોટિસ

મોરબીના ચકચારી 602 જમીન કૌભાંડની ફરિયાદમાં જેનું નામ હતું અને હાલમાં તેને આરોપી તરીકે સીઆઇડી ક્રાઇમની ટીમે પકડીને રિમાન્ડ ઉપર લીધેલ છે તે તરઘરી ગામના સરપંચને મોરબીના જિલ્લા વિકાસ અધિકારી દ્વારા કારણદર્શક નોટિસ આપવામાં આવેલ છે અને તેને સરપંચના હોદા ઉપરથી દૂર કરવા માટેની કાર્યવાહી અધિકારી દ્વારા કરવામાં આવેલ છે.

મોરબી જિલ્લા વિકાસ અધિકારી દ્વારા માળીયા (મી) તાલુકાનાં તરઘરી ગામના સરપંચ સાગર અંબારામભાઈ ફુલતરીયાને હાલમાં કારણદર્શક નોટિસ આપવામાં આવેલ છે. જેમાં જણાવ્યુ છેકે, માળીયાના ટીડીઓ દ્વારા ગત તા. 14/5 ના પત્ર દ્વારા જાણ કરવામાં આવી હતી કે, મોરબી સીટી એ ડીવીઝન પોલીસ સ્ટેશનમા ફરીયાદી ભીમજીભાઈ બેચરભાઈ દ્વારા વજેપરના સર્વે નંબર-602 વાળી જમીનમાં થયેલ ગેરરીતી સંદર્ભે ફરિયાદ નોંધાવવામાં આવેલ છે જેમાં આરોપી તરીકે સાગર અંબારામભાઈ ફુલતરીયાનું એફઆઇઆરમાં નામ છે. "ગુજરાત પંચાયત અધિનિયમ-1993 ની કલમ 59(1) મુજબ સરપંચ અથવા ઉપ-સરપંચ સામે નૈતિક અધઃપતનવાળા કોઈ ગુનાના સંબંધમાં કોઈ ફોજદારી કાર્યવાહી કરવામાં આવી હોય અથવા જેને કોઈ ગુના માટે ઇન્સાફ દરમ્યાન જેલમાં કે અટકમાં રાખવામાં આવ્યો હોય અથવા જે કલમ 30 હેઠળ પંચાયતના સભ્ય તરીકે ચાલુ રહેવા માટે ગેરલાયક ન ઠરાવે તેવી કેદની શિક્ષા ભોગવતો હોય અથવા જેને તે સમયે અમલમાં હોય તેવા નિવારક અટકાયતને લગતા કોઈ કાયદા હેઠળ અટકમા રાખવામા આવ્યો હોય તેવા સરપંચ અથવા ઉપ-સપંચને હોદા પરથી મોકુફ કરી શકાશે. જેથી સાગર અંબારામભાઈ ફુલતરીયા તરઘરીના સરપંચ તરીકે છે અને તે પાયાની ફરજ બજાવવામાં નિષ્ફળ ગયા હોવાનું સ્પષ્ટપણે જણાઈ આવે છે. આથી ગુજરાત પંચાયત અધિનિયમ-1993 ની કલમ-59(1) હેઠળ તેની સામે શા માટે પગલા ન લેવા ? તે બાબતેનો ખુલાસો કરવા હાલમાં કારણદર્શક નોટિસ આપવામાં આવેલ છે અને આગામી તા 8/8/25 ની મુદત રાખવામા આવેલ છે. અને જો ખુલાસો કરવામાં નહિ આવે તો તે કંઈ કહેવા માંગતા નથી તેમ માનીને તેની સામે આગળની કાર્યવાહી કરવામાં આવશે.