જામનગર બાજુથી અંજીયાસર કતલ કરવા લઈ જવાતા પાંચ ગૌવંશોને મોરબી નજીકથી ગૌરક્ષકોએ બચાવ્યા: 6.57 લાખનો મુદામાલ કબ્જે

મોરબીના વાવડી રોડ ઉપર આવેલ ગૌશાળાની બાજુમાંથી પસાર થઈ રહેલ ગાડીને રોકીને ગૌરક્ષકો દ્વારા ચેક કરવામાં આવતા તેમાં નાના-મોટા પાંચ ગૌવંશોને બાંધીને માળીયા બાજુ કતલખાને લઈ જતા હોવાનું સામે આવ્યું હતું જેથી ગૌરક્ષક દ્વારા મોરબી એ ડિવિઝન પોલીસ સ્ટેશન ખાતે ફરિયાદ નોંધાવવામાં આવતા પોલીસે એક શખ્સને પકડીને 6,57,500 ની કિંમતનો મુદ્દામાલ કબજે કર્યો છે અને અન્ય એક શખ્સનું નામ સામે આવ્યું હોય બંને સામે ગુનો નોંધી બીજા આરોપીને પકડવા માટે તજવીજ શરૂ કરી છે.

મોરબી શહેરના સામાકાંઠા વિસ્તારમાં આવેલ રામકૃષ્ણનગરમાં કુળદેવી પાન પાસે રહેતા હિતરાજસિંહ હરુભા પરમાર (26)એ મોરબી એ ડિવિઝન પોલીસ સ્ટેશન ખાતે હેમંતભાઈ પ્રભુદાસ દેસાણી (45) રહે. દરેડ ગામ તાલુકો જામનગર અને મહેશભાઈ સરાણીયા નામના બે વ્યક્તિઓની સામે ફરિયાદ નોંધાવેલ છે જેમાં જણાવ્યું છે કે, જામનગર બાજુથી ખાનગી વાહનમાં ગૌવંશને ભરીને માળીયા તાલુકાનાં અંજીયાસર ગામે કતલ કરવા માટે લઈ જવાના છે તેવી બાતમી મળી હતી જેથી કરીને મોરબીના વાવડી રોડ ઉપર આવેલ ગૌશાળાની બાજુમાંથી વોચ રાખી હતી ત્યારે ત્યાંથી પસાર થઈ રહેલ મહિન્દ્રા વીરો ગાડી નંબર જીજે 10 ટીવાય 3732 લઈને હેમંતભાઈ દેસાણી પસાર થઈ રહ્યો હતો તેને રોકીને વાહન ચેક કર્યું હતું ત્યારે તેમાંથી નાના મોટા પાંચ ગૌવંશ મળી આવ્યા હતા અને આ અબોલ જીવને કુરતાપૂર્વક બાંધીને ઘાસચારો કે પાણીની વ્યવસ્થા રાખ્યા વગર અને કોઈ અધિકારીની પાસ પરમીટ મેળવ્યા વગર કતલખાને લઈ જવામાં આવતા હતા જેથી કરીને 7,500 ની કિંમતના અબોલજીવ તથા 6.50 લાખ રૂપિયાની કિંમતનું વાહન આમ કુલ મળીને 6,57500 ની કિંમતનો મુદ્દા માલ કબજે કર્યો હતો અને પોલીસ દ્વારા આ ગુનામાં હેમંતભાઈ દેસાણીની હાલમાં ધરપકડ કરવામાં આવેલ છે જોકે, મહેશભાઈ સરાણિયા નામના શખ્સને પકડવા માટે થઈને પોલીસ દ્વારા આગળની તપાસ હાથ ધરવામાં આવી છે

દેશી દારૂની ભઠ્ઠી

ટંકારાના સાવડી ગામથી ઓટાળા ગામ તરફ જવાના કાચા રસ્તા ઉપર બાવળની જાળીમાં દેશી દારૂની ભઠ્ઠી ચાલુ હોવાની હકીકત મળી હતી જેના આધારે પોલીસે ત્યાં દારૂની રેડ કરી હતી ત્યારે સ્થળ ઉપરથી 50 લિટર દેશી દારૂ તથા દેશી દારૂની ભઠ્ઠીના સાધનો મળી આવતા પોલીસે કુલ 11,400 રૂપિયાની કિંમતનો મુદ્દામાલ સ્થળ ઉપરથી કબજે કર્યો હતો જો કે, રેડ કરવામાં આવી હતી ત્યારે આરોપી સ્થળ ઉપર હાજર ન હોય આ માલ રવિરાજસિંહ વિક્રમસિંહ જાડેજા રહે. ડેડકદળ તાલુકો ધ્રોલ વાળાનો હોવાનું સામે આવતા તેની સામે ટંકારા તાલુકા પોલીસ સ્ટેશન ખાતે ગુનો નોંધી પોલીસ આગળની કાર્યવાહી હાથ ધરી છે.