મોરબીના કાંતિનગરમાં ટેમ્પોના ચાલકે હડફેટે લેતા ચાર વર્ષના બાળકનું મોત

મોરબીના કાંતિનગર વિસ્તારમાંથી ચાર વર્ષનો બાળક ચાલીને જઈ રહ્યો હતો ત્યારે ટેમ્પોના ચાલકે તેને હડફેટ લેતા બાળકને માથામાં ગંભીર ઇજા થઈ હતી. જેથી તે બાળકનું મોત નીપજયું હતું અને હાલમાં મૃતક બાળકના દાદાએ મોરબી બી ડિવિઝન પોલીસ સ્ટેશન ખાતે ફરિયાદ નોંધાવતા પોલીસે ટેમ્પોના ચાલક સામે ગુનો નોંધીને આગળની કાર્યવાહી હાથ ધરી છે.

જાણવા મળતી માહિતી મુજબ મોરબીમાં માળિયા ફાટક નજીક આવેલ કાંતિનગરમાં મસ્જિદની બાજુમાં રહેતા યુનુસભાઈ જુમાભાઇ અજમેરી જાતે પીંજારા મુસ્લિમ (61)એ હાલમાં અશોક લેલન કંપનીના ટેમ્પો નંબર જીજે 36 વી 3941 ના ચાલકની સામે ફરિયાદ નોંધાવેલ છે જેમાં તેને જણાવ્યું છે કે તેનો ચાર વર્ષનો પૌત્ર અનસ ગઇકાલે બપોરના એકાદ વાગ્યાના અરસામાં કાંતિનગરમાં શેરીમાંથી ચાલીને જતો હતો ત્યારે ટેમ્પોના ચાલકે તેને હડફેટે લેતા અકસ્માત થયો હતો જે બનાવમાં અનસ ને માથાના ભાગે ગંભીર ઇજા થઈ હતી જેથી તેનું મોત નીપજ્યું હતું અને આ બનાવમાં મૃતક બાળકના દાદાએ નોંધાવેલ ફરિયાદ આધારે પોલીસે ટેમ્પો ચાલક સામે ગુનો નોંધીને આરોપીને પકડવા માટે તજવીજ શરૂ કરી છે

ઝેરી જનાવર કરડી ગયું

મોરબી તાલુકાના નાગડાવાસ ગામ પાસે આવેલ મઢુલી હોટલ પાસે ગોપી ખીમસિંગ રાજપુત (19) નામની યુવતીને ઝેરી જનાવર કરડી જતા તેને સારવાર માટે મોરબીની સિવિલ હોસ્પિટલ ખાતે લાવ્યા હતા અને ત્યાં તેને સારવાર આપ્યા બાદ આ બનાવની મોરબી તાલુકા પોલીસને જાણ કરવામાં આવતા પોલીસે બનાવની નોંધ કરી આગળની કાર્યવાહી હાથ ધરી છે

અકસ્માતમાં ઇજા

મોરબીના ટિંબડી ગામના પાટીયા પાસે વાહન અકસ્માતનો બનાવ બન્યો હતો જે બનાવમાં રણજીતસિંહ કુલદીપસિંહ લાલી (34) રહે. પંજાબ વાળાને ઇજાઓ થઈ હતી જેથી તેને સારવાર માટે મોરબીની સિવિલ હોસ્પિટલ ખાતે લાવ્યા હતા અને ત્યાં તેને સારવાર આપીને આ બનાવની મોરબી તાલુકા પોલીસે જાણ કરતા પોલીસ આગળની કાર્યવાહી હાથ ધરી છે